要乜就有乜（上）
我曾經以為，終其一生，我都唔會得到愛情。
我又唔係有錢，又唔係靚仔，講咩識哄女仔啊、六舊腹肌十項全能啊，更加冇我份。
大家可能會講，好多平凡嘅男仔，都可以擁有自己嘅愛情。
最大嘅問題係，我鍾意嘅女仔玲玲，實在太過優秀。
佢係我嘅鄰居，我細細個就鍾意咗佢，發誓大個一定要娶佢做老婆。
但玲玲愈大愈靚，好多男仔追佢。
我好肯定，我鍾意玲玲，唔係因為外表，我自細就鍾意佢，一直都鍾意佢……
但無論有幾真心，都改變唔到呢個事實：我只係無數追求者中最唔起眼嘅一個。
我曾經鼓起勇氣，向玲玲表白，俾佢拒絕咗，佢話佢對我冇「感覺」。
唉，我都估到，玲玲點會鍾意我呢啲一無是處嘅薯仔。
我都冇怪玲玲，每個人都有選擇另一半嘅權利嘛。
只不過，玲玲拒絕我之後，我都有嘗試過同其他女仔接觸。
冇感覺。
無論對方鍾意我定唔鍾意我，我都冇感覺。
可能就好似玲玲對我一樣，冇感覺。
我係一個寧缺勿濫嘅人，既然對其他女仔冇感覺，就唔會去追人哋。
我一直單身，直到嗰一晚，中學同學聚會。
玲玲唔係我嘅中學同學，所以嗰晚我冇見到玲玲，只係一班舊同學，喺度炫耀佢哋嘅成就。
唔係專業人士，人工唔高，連女朋友都冇嘅我，只可以瑟縮喺一角，睇住大家高談闊論。
忽然有人拍吓我膊頭，伸出手腕：「阿峰，你覺得我隻錶點啊？」
佢係我嘅舊同學Tony，做金融嘅，最鍾意炫耀自己識到咩大客，搵到咩大錢，買到咩名牌。
我望向Tony嘅手腕，戴住一隻Rolex嘅綠水鬼，十幾萬一隻。
我用最真誠嘅語氣答：「好正啊，我都好想要呢隻錶啊，你真係好叻喎。」
我講嘅係真話，但就同「我想玲玲做我女朋友」一樣，想還想，以我嘅財力，根本唔會買到一隻係我半年人工嘅錶。
Tony得到我嘅恭維後，好滿意咁望向另一個同學，繼續炫耀。
呢件事本來只係一個小插曲，但第二朝起身，我赫然發現，嗰隻綠水鬼戴喺我手腕上。
我呆咗。
我拎起手機，發現中學同學個Group，已經有成百條wts。
原來，Tony唔見咗隻錶，跟住報咗警。
睇到呢度，我個心都離一離，唔通我尋晚飲多咗，偷咗佢隻錶？
但Tony繼續講，報警後，酒樓即刻翻查閉路電視紀錄，證實佢走嗰陣仲帶住隻錶。
所以，酒樓同我哋呢班在場嘅同學，都撇清咗嫌疑。
Tony不斷喺個Group度呻，隻錶係佢儲咗半年錢先買到，有幾咁鍾意隻錶……
尋晚到底發生咗咩事？我肯定冇掂過隻綠水鬼，只係講咗一句「我都好想要呢隻錶」。
唔通我突然有咗超能力，話想要乜就有乜？
嗰晚我放工番屋企，阿媽帶我去睇廚房啲蟹，話聽日有親戚上嚟食飯，買咗蟹準備煮，問我啲蟹係咪好生猛。
「係啊，我都好想要呢隻蟹啊。」我試探性咁講。
第二朝起身，我身上有一隻大閘蟹，爬嚟爬去。
呢鋪發達啦！
我唔洗再返啲搵唔到大錢嘅工，想要咩就可以有咩。
我即刻辭職，用我嘅超能力，「想要」咗一大筆錢。
我同其他人講，我中咗六合彩，然後就買車買樓。
有咗錢，我再次向玲玲表白，我同佢講，我一定可以畀到幸福佢。
點知玲玲好認真咁望住我：「阿峰，我上次拒絕你，真係唔係因為你冇錢。」
「我唔係覺得你拜金，我知每個女仔都想要安全感……」我手足無措。
玲玲搖搖頭：「我拒絕你，唔係因為你嘅條件係點，係因為我對你冇感覺。就算夾硬同你一齊，大家都唔會幸福。」
我好灰咁返咗屋企，講真，我絕對有衝動講：「我都好想要玲玲」。
但話到嘴邊，我總係講唔出口。
玲玲唔係死物，佢係一個活生生有感情嘅人，如果佢因為我嘅超能力，被逼同我一齊，咁佢點會開心？
我忍住咗我嘅慾望。
下集：https://bit.ly/3ygUL3K
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #要乜就有乜
