連續十次教仔失敗（下）
上集：https://bit.ly/3ADxmLE
估唔到，呢種爭執唔係一次兩次。
阿女迷上咗拉小提琴，甚至話第日要讀音樂，做一個音樂家。
搵到錢嘅音樂家，邊有咁易做到？一百個都冇一個啦。
我上網搵晒小提琴老師嘅時薪，計埋佢哋一個星期有幾多學生，整咗個收入Excel畀阿女睇：「做小提琴老師搵到幾多錢？收入仲要唔穩定。」
「但我真係唔鍾意讀書，我鍾意拉小提琴。」阿女突然講：「一開始，係你逼我學小提琴㗎，連部小提琴都係你買畀我。」
我答：「係，我想你學多幾樣技能，隨便考幾級，報學校嗰陣個Profile靚啲丫嘛。咁你已經考到Band 1，就唔洗再拉小提琴啦。」
阿女難以置信：「你嗰陣話，學音樂陶冶性情，覺得女仔提小拉琴好靚…..」
我嗤之以鼻：「嗰陣你細個丫嘛，梗係要講得靚啲。」
第二日，阿女跳樓身亡。
我除低頭盔，又一次考試失敗。
我不斷諗，點解我會咁樣逼個女呢？
或者我初時只係唔想溺愛佢，拒絕佢唔合理嘅要求，漸漸就變成，要佢滿足埋我嘅要求。
當佢一次又一次咁滿足我，我就以為自己係啱，步步進迫。
最後，佢好似一條橡筋咁，俾我拉得太緊，斷咗。
老公安慰我：「呢次都係意外嚟啫。考公開試嗰陣，你係女狀元嚟㗎喎，你咁叻考驗，下次一定可以合格！」
「希望啦。」我好灰。
為咗做阿媽，我下年會再嚟過。
然後，我一年又一年咁考試。
我有過唔同嘅背景，有錢嘅、窮嘅、夫妻恩愛嘅、單親嘅；遇過唔同嘅「仔女」，勤力嘅、懶惰嘅、調皮嘅、文靜嘅……
但我考咗十年，每一年都唔合格。
我年紀愈嚟愈大，依加已經係高齡產婦，再過多幾年，就算我考試合格，都生唔到仔啦。
我問老公：「你覺得我有咩問題？點解我次次都唔合格？」
過往十年，老公都係安慰我、鼓勵我，但呢一次，老公居然講：「可能係因為，你個人比較極端？」
「咩極端？」我唔係好明。
老公解釋：「你教細路只有0同100咁，係冇50嘅，一係就溺愛，一係就太嚴格；一係就太冷淡，一係就唔肯放手。」
「我可以點啫？每次考試，都會忘記自己考緊試，跟住自自然然就唔合格。」我都唔知點算好。
老公小心翼翼咁問：「你有冇懷疑過，你唔適合做阿媽？」
「咩話？」我成個彈起。
老公話，考試嘅目的，就係測試一個人適唔適合做父母。
既然我多次考試唔合格，就證明我唔適合，咁唔生仔咪得囉。
我瞪大雙眼：「但我係一個女人，我鍾意小朋友。」
「你中學嗰陣，啲Science考得好差，咁你咪唔讀理科，讀文科囉。」老公大惑不解：「咁點解你做阿媽做得差，仲堅持要做？」
我反駁：「讀書同做人父母係兩回事。」
「就係因為做人父母更重要，所以更需要適合嘅人去做。」老公咁樣講。
你有聲帶，唔代表你唱歌好聽；唱歌好聽，都唔代表你會做到歌手。
咁點解會有人覺得，有健康嘅身體同伴侶，就適合生育？
為人父母係一件好重要嘅事，正因為重要，更加應該由適合嘅人去做。
—完—
我嘅職業係：屍體Cosplayer：https://goo.gl/xeBv1R
我與食人者不得不說的故事：http://bit.do/fmSWG
#短故 #短篇 #小說 #陳美濤 #廣東話 #粵語 #tomatochan #連續十次教仔失敗
連續十次教仔失敗 在 廿四孝父母- 24parent.com - 失敗乃成功之母 - Facebook 的推薦與評價
某朋友湊仔女自稱「焦頭爛額」，經常參詳我的「親子三十六計」，見我寫了那麼多萬字，以為我對付孩子計謀多多，教仔一定十分成功。錯！ ... <看更多>