《香港工業傳奇展覽》
「謹將這個展覽，獻給所有曾為香港工業付出努力的香港人。」
今日晨早流流想去歷史博物館睇《香港故事》，點知無啦啦比我發現做緊呢個《香港工業傳奇展覽》專題展。真係完全無見過任何嘅宣傳，我都係去到先知有的睇。呢個係高質嘅展覽！非常值得睇！😆😆😆
呢個展覽嘅主題就係香港工業，講MADE IN HONG KONG。展覽場地非常之大同埋設計得好有香港特色，由太古方糖講到紅A塑膠再講到工廠妹，每一項香港工業都講得非常detail而且有非常多珍貴嘅展品睇，例如單據同埋包裝。裡面每樣物件都好有美感同埋睇得出整佢哋嘅人好有心機，d產品包裝真係靚到一個點！
其實睇完有少少感動，見到香港經濟起飛嘅時候大家都默默打拼努力賺錢養家，亦成就左香港嘅輝煌時代。真係唔講唔知，展覽裡面有提到香港嘅銀器業係曾經勁到著名珠寶品牌Tiffany&Co.睇中黎賣同埋玩具生產量都曾經係世界第一！🥳
同埋都幾特別嘅係入場有機會會送d香港出品嘅嘢俾你，我今日就收到嘉頓餅乾，大大盒都幾抵......遲d會送花生油同洗潔精.....（好似好師奶咁，😂😂但都叫值回票價！）
對「香港製造」有興趣嘅你記住去睇喇！
呢個展覽今日開展，做到八月尾，成人$10，學生$5。
不過疫情期間去係要攞籌，詳情（摘自歷史博物館官網）如下：
• 開放時間為每日上午10時至下午5時，休館日除外，入場將會限制人數以控制人流 *
*香港歷史博物館採取分段式入場安排，每節兩小時，開放時段為：
上午10時至中午12時 / 下午12時半至下午2時半 / 下午3時至下午5時
每日即場派籌，時間分別為 : 上午10時 / 中午12時 / 下午2時半
香港歷史博物館
《『工』不可沒 ── 香港工業傳奇》
6.17-8.24
