［迷失十年，廿年，卅（＊）年］日本股市卒之見家鄉，sort of
彭博原文：Japan Stocks Finally Beat Bubble-Era High, at Least on One Gauge（https://bityl.co/3iYB）
TLDR：日經指數就仲爭七成，但日經500已經破咗1989年高位。呼，人生有幾多個卅年？
1. 1989年12月29日，你做緊乜？可能有啲讀者未出世，埃汾當然出咗世，11歲。呀仲有，我中學時曾經巧鍾意嘅女同學，係12月29號出世的。後來嫁咗畀我另一男同學，啤咗兩件（定一件？）。重點係住在我樓上添，篤眼篤鼻，而小學年代（即係1989年），我同嗰位男同學十分老友，成日上佢屋企打機，因為就在我樓上。但當然中學已經疏遠咗，況且呀女主角根本冇同我拍過拖，所以不存在咩搶唔搶嘅問題。純係我單戀不遂咁解
2. Sorry講多咗，但至少引到你睇落去。為咗引你睇落去我係無所不用其極的，同街邊（東南亞？大陸？）啲乞兒扯開個傷口畀你睇差不多。
3. 講返，1989年12月29日。你睇題目估到啦，日本。日本發生咩事？1989年就係日本泡沫經濟高峰，雖則經濟冇話邊一個位爆破，但稱12月29日係爆破點，應該係共識。
4. 因為嗰日，日經平均指數去到史上最高—打後咁多年都冇返到去咁嘅位。而家2020年，即係迷失十年，轉眼間變迷失廿年，變到迷失卅年。
5. 對日本文化稍為理解嘅人（即係，所有香港人），都會知道呢個泡沫經濟，迷失十/廿/卅年。因為係無數咁多日本作品嘅題材—其中一套最出名嘅，當然係近排楷仔台有得免費睇返嘅，《悠長假期》（絶對唔係植入廣告）。大家知啦，松隆子當時係新人，而家已經要演人阿媽（《最後的情書》，好合理喎，43歲）。但木村依然屹立不倒／阻住地球轉。
6. 《悠長假期》嘅背景就係泡沫經濟後嘅失落一代嘛，終身僱用制玩完，再冇咩一大堆10000 yen爭住截的士嘅場面。
7. 不過唔使灰心，嘻，「只要活著就有辦法嘛」，近來興講。亦即係埃汾常講嘅「留得賓周在 哪怕沒春袋」。當然廢老同你講「只要活著就有辦法嘛」就係風涼話 何不食肉糜，都係睇日劇好
8. 講返，真的，「只要活著就有辦法嘛」，事隔30年！日經指數卒之返返當年高位！！！！
9. 不過，電視節目有好多種，恒生指數有好多種（冇聽過恒生國企指數？恒生科技指數呢？恒生綜合指數呢？），日經指數都有好多種。一般講嘅日經指數，係指日經225，就未返到高位。唔使開香檳住
10. 但至少，日經500，就真係創出歷史新高了！突破咗1989年12月29日嘅高位—事隔30年後。噢耶
11. 滬深300，就真係300隻股票。富時100，亦係100隻股票。日經225，就係225隻股票。咁日經500，就真係500隻成份股（廢話？咁香港十隻白虎係咪10隻？唔知，冇數過，好似講股票的，有獨角獸有白馬股可能有白虎股，正如有唐伯虎亦有嚴白虎）。
12. 因乜解救會日經500破頂，日經225未破？當然係成份股不同。咁500入面係邊隻帶動？
13. 登登，就係惡名昭彰嘅，任天堂！
14. 舊文都寫過，日經指數基本上係照抄美國道指—戰敗國嘛。事實係戰後嘅嘢，但你話，唔係喎，你見到1949年之前都有數字—冇錯，但只係date back 返。日經指數出現，的確係戰後嘅事，唔信你自己搵日本報紙睇飽佢。咁，由於日經照抄道指，亦承繼咗道指種種不科學嘅嘢，有機會再講。
15. 但呢度想講嘅係，任天堂，係唔在日經225入面嘅！但在日經500！點解？莫非唔夠大？又唔係喎。你常識都估到，任天堂點都係日本大公司。事實任天堂市值應該係日本十大
16. 呢類東西，等我賣個廣告，遲下Patreon 周末專題會講，正如之前寫過美國大選，寫過Palantir，寫過畢菲特點解買日本商社。記得去訂（https://bit.ly/31QmYj7）
17. 賣完廣告，返返嚟。任天堂今年股價上天堂咁滯，年頭至今升超過40%，低位到而家更差不多一個double．但偏偏日經（225）指數就冇份，日經500先有。
18. 如果有會點？我就懶計了。不過由於日經225嘅老味計法，就算有埋任天堂，我心算都估唔會可以一命救全家。事實係日經225今年只係持平（都好過好多地方架啦），但日經500升咗8%。唔止係一隻任天堂
19. 仲有一啲其他公司係日經500有，而日經225冇。包括Keyence（キーエンス），一度係日本第二大公司（但都唔入日經225，死未），SMC Corp，仲有賣傢俬嘅Nitori （ニトリ）
20. 當然，唔一定話係日經500比較好，但至少可以質疑日經225嘅代表性（任天堂又冇，Keyence又冇，兩間都十大企業喎）。而其實日經225同500一樣，都係抄道指，price weighted，十分低智。Uniqlo嘅Fast Retailing就佔咗日經10%比重，三倍市值嘅Toyota就得1%比重，十分神化。
21. 高程度啲嘅，可能聽過TOPIX—冇錯就係科學啲，仲要包1700隻股票—「但又太多啦」，啲人又話太多細股又冇流通性好難track
22. 實情以上種種，包括任天堂同Keyence入日經之類，都講咗好一排。但日本嘛，再搞多幾年先啦。
23. 最後講下，日經（225）當然未返1989年12月29日嘅高位。而家23500點左右。1989年12月29日？差不多38900點，再等下啦，升多六成幾。
24. 其實真係冇你想像中咁難，我諗最值得講嘅係：日經500己經返返當年高位，但日經（225）要升多六成幾先返到。咁變咗你拎咩「股市」嚟講返日本經濟，有何意義？指數？誰的指數？
25. 仲有個小補充。基本上講泡沫經濟，迷失十／廿／卅年，必然仲要講嘅，係MK仔都知嘅，「廣場協議」，日圓升值。
26. 首先，廣場協議並唔係在任何廣場簽嘅（真的）。而1989年已經係廣場協議後嘅4年，日圓升值最急嗰浸已經過咗。不過，而家嘅日圓，仲係貴過當年嘅。如果你用香港人角度，當年係5算（嘩），而家7算，早幾年10算都見過
27. 亦即係，其實對外國投資者嚟講，你計及匯率，日經500一早就返咗家鄉。日經（225）呢？仲未，但升多兩成幾就得了。
28. 但當然，所謂「美國迫日本升值令日本出口競爭力大跌經濟泡爆」呢個論述，並唔係全部人都同意。甚至「迷失十／廿／卅年」呢樣嘢，都有人話係日本人撚化你嘅。日本人生活水平好差咩？「同香港比就係嘅」。有機會在Patreon都會寫
29. 有關平成年代嘅日本股市，之前medium仲有長文寫過，免費的（https://bityl.co/3iZF）
30. 記住訂Patreon啦，遲下成個日經指數同你研究，仲有埋Excel畀你自己玩。（https://bit.ly/31QmYj7）
（＊）之前寫文用過「卅」字，居然有人問我做乜用日文字，仲問我隻字點打，繁體字係乜。照計金庸張三丰畀人屌話寫殘體字嘅日子不遠。或者下次寫個卍字會畀人話係納粹（聽聞個「卍」字在日本變咗潮語）
——————————————————————————
Ivan Patreon 狼耳街華人，一星期至少三篇港美市場評點，其他免費好文推介，每日一圖，仲有FB Page post summary．一個月一舊水唔使，開張一個月已近 500人訂，仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
彰女選課 在 [開服] 流星ワールドアクター- DMM_GAMES - PTT網頁版 的推薦與評價
30樓 → swiftthunder: 而且勇女從開服到結束營運都有個廢棄系統完全沒開 01/12 19:13 ... 108樓 → TachibanaMik: 事前桔梗開局必三選課拉利斯但. ... <看更多>