#本故事純屬虛構
#如有雷同實屬巧合
這是一篇讓大家久違了之短篇小說。
希望盡力在這局勢底下也能娛樂大家,滿意請分享。
----《慾警聚》----
「 PC1011678 ,PC1011309, 沙展26895 calling ,over 」
「係,陳沙展請講,Roger。」
「我講定先,聽日我屋企有事,我唔會返嚟,張Sir都會去另一個環頭開會,無論你地聽日有咩operation,啲曱甴搞唔搞事都好,你地兩個自己醒定啲,衰撚咗咪話係跟開我同張Sir。」
「無問題,Copied。」
對講機通話完畢,志誠低頭沉思了片刻,他覺得這是近幾個星期以來,實行計劃的最佳時機,志誠慢慢把頭擰向跟自己一同在街上行孖beat的肥文,神色凝重地問了一個問題。
即使上水石湖墟的街道如何車水馬龍,水貨客在藥房中如何的吵雜,志誠的這句問題,仿佛把這個世界凝住了。
「如果我地聽日唔洗OT,你會唔會同我一齊去打劫?」
————
PC1011678志誠跟PC1011309肥文早於學堂認識,畢業後一同隸屬上水分區巡邏小隊已有四五年,如果要志誠選擇一個自己能夠信任的人,肥文是唯一的選擇。
「吓,我地去打劫!?」肥文忍不住震驚的問,旁邊藥房兩個年輕職員聽到,也疑惑地望著志誠跟肥文兩位軍裝警員。
「係,我認真,唔該你細聲少少...」
對於志誠來說,六七年散仔的生涯不難過,反而就因為吞pop的時間太多令自己染上賭外圍波的惡習,不知不覺已欠落30萬卡數,再爭二線財仔近廿萬。
志誠的老婆也跟自己的上司和太太們稔熟,她看著陳沙展一家搬入宿舍,所以一直抱怨何解志誠的宿舍卻遙遙無期,而張Sir更是高一級的警署警長,她知道張警長替太太買下元朗的低密度私樓,但她連提也不敢提,因為怕志誠自卑,志誠心底裏很清楚老婆有這種想法。
「打劫除咗為錢,仲係為咗香港...你信我一次,我地聽日射波,一齊扮暴徒去打劫!」志誠說。
————
「呢個計劃係天衣無縫,你諗吓,而家著住暴徒嘅裝束周街行根本無人會理,只要我地著住黑衫,戴住面罩手套,扲埋我地把槍,衝入金行或者錶行,根本想點就點!只要我地打劫成功,錢就會到手,民意都會逆轉,反正佢地暴動開,唔爭在打劫埋。」
肥文答道:「我都好想發洩,尋晚著咗八九個鐘頭防暴裝企响條街度頂撚住班仆街曱甴,班友係咁大叫黑警呀,屌你老母呀,呢啲我真係無乜感覺,佢地咪繼續鬧囉。但係,佢地大叫『警察OT,警嫂3P』,嘩真係好有畫面,我企响度都聽撚到㷫熻熻,大佬我無老婆家嘛,咪焗住諗起其他人啲老婆囉...阿志誠,sorry,我指其他伙記啲老婆,我唔會咁樣諗阿嫂嘅。」
「是但啦,咁你係咪即係答應?」志誠問。
「平時full gear出動我都好驚,打劫個陣仲要得把槍...」肥文有點猶豫。
「以而家嘅警力,有人報警,都未必有伙計過到嚟,過到嚟都起碼九個字,你驚咩?」
「你咁講...又好似係,志誠,我一向覺得你有勇有謀,你話咁就咁。」
「肥文,好多謝你呢位兄弟信我。講真,與其做乜都畀人話係知法犯法,不如真係去犯法。」
肥文點頭表示同意:「行動代號我啱啱都諗埋。」
「係咩?」
「兄弟爬山。」肥文以堅定的眼神說。
————
兩位上司,陳sir跟張sir翌日都不在警署,志誠和肥文都知道這天report sick算是最好的時機,他們二人於傍晚時份各自出發,換上黑色tee恤,口罩,頭盔,護目鏡,穿上3M勞工手套,孭着背囊,tee恤內的腰間綁上槍袋,槍袋內當然還有左輪手槍。
他們從上水火車站附近一起出發,步行到上水廣場。志誠已經有了部署,他曾經踩線,知道上水廣場二樓的八寶金行職員少,金器多,打劫會是最穩陣的選擇。
「其實我地要打劫幾多金器走?」肥文問。
「唔好扲太多,每人最多扲4-5公斤就夠,萬一扲太多走唔郁就大撚獲。」
「咁4-5公斤即係有幾多錢?」
「黃金通常用両去計重量,而家一両大約$14000港紙,1公斤大約有26両,咁你自己計吓4-5公斤黃金可以賣幾錢。」
「嘩屌你原來一獲可以執成千幾二千萬,點解你唔早講!?班真暴徒人多勢眾但諗唔到可以去打劫咁戇鳩嘅?」畢竟肥文只是毅進畢業,志誠知道他計多了十倍價錢,不過還是選擇不掃他的慶。「錢多唔多唔緊要,最緊要係搵返我地心靈創傷嘅賠償。」
「入到去,你負責指嚇職員,我負責爆玻璃,搶金器,其實無乜要留意,最緊要快!」在前往上水廣場的天橋上,志誠隔著口罩認真的說,肥文點頭爽快回應,其實他緊張得手心濕了,勞工手套幾乎可以滴出水。
其實打劫係點打?沒有打劫經驗的肥文,只好不斷回憶各類警匪片的對白與搶劫場面來定經及麻醉自己,想著想著,這段步行路程原來比想像中短,他機械式的跟著志誠的步伐,不知不覺已經走入商場,轉幾個彎,眼前已是八寶金行,志誠把用手按一按實護目鏡,眼神變得凌厲,然後從背囊拿出一支鐵撬蓄勢待發,肥文知道自己是時候也要配合起來,從腰間提出了左輪手槍,衝進八寶金行。
心蹼蹼的響,肥文從未用左輪手槍瞄準過任何真人,他緊張得忘了一切剛才在心中已預備,打劫時要說的台詞,反而,突然職業病發作,腦海中浮現近兩個月工作時不斷要說,不斷要聽的一句話,他舉起槍,望著金行兩個中年男職員衝口而出大喊,:「請勿衝擊警方防線!」
————
志誠目瞪口呆望著肥文,但這不是責備的時候,他補了一句「屌你老母,打劫呀!」然後用鐵撬大力扑爆入口前方的玻璃櫃面,然後再一棍撃落職員的太陽穴位置,畢竟志誠以警棍偷襲示威者已有長達兩個月經驗,這記攻擊當然一樣快而準,職員一下子頭破血流,即時暈倒,而肥文繼續用槍指嚇著另一職員。
金行門外有人尖叫,有人驚呼打劫,志誠還是冷靜,不用半分鐘,他已把幾盤金器倒入自己和肥文的背囊,「好,走得!」,他們開始拔足而逃。他們的計劃是按原定的路線穿過上水站跑到警力更少的彩園邨,然後在沒有人的角落脫下外面的黑衣,除下gear,剩穿白色的汗衣,如果沿途沒有人追隨,甚至可以只裝作是一般的示威者,慢條斯理地前行。
但他們一離開金行,在商場返回天橋時,他們赫然看到天橋上列陣的,是一隊為數約三十人的防暴警察。
————
「吓,點解無啦啦有防暴。。。」肥文邊跑邊問,志誠也不清楚,能做到的只是再回頭跑入商場,當他們回到上水廣場,剛才高呼有人打劫的路人和保安好像不見了,反而商場一二樓也是為數近百人的示威人仕。
「跟我嚟,我地走入人堆就無事。」志誠說,然後肥文就跟著志誠,從電梯走落到地下大堂,行入為數更多的黑衣人堆。
他們從黑衣人的對話中打聽到,他們這堆人群應該是剛從新豐路那邊被另一組的防暴驅散入商場,反正這時候個個示威者都是一式一樣,已無人認出他們剛到金行打劫過,肥文跟志誠也開始鬆一口氣。
但這時候,一位戴著黃色工程帽的年輕示威者捉著肥文的臂膀,大聲叫著「有鬼呀,呢個黑警嚟架!」原來肥文逃跑時早已把槍放入槍袋中,但他的tee恤,卻不小心攝了入槍袋與牛仔褲的空隙之間,令整個槍袋與槍枝完全外露。
————
這時另一位更健壯的示威者把肥文推跌在地上,志誠在旁不敢作聲,不想令人以為他們是一伙,只在旁偷偷看著。
被壓在地上的肥文動彈不得,有示威者上前伸手搜他的背囊,亦有人除下他的護目鏡跟口罩。志誠心想這次完了,最壞情況,自己可能先行逃去,沒辦法之下只好遺下肥文。他看見示威者從他的背囊中搜出的第一件東西,不是金器,反而是更糟糕的東西──肥文的委任證。
究竟是什麼原因驅使肥文返工時不帶委任證,打劫時反而帶呢,志誠不知道,他只是心裏非常後悔,後悔帶了這個弱智的毅進仔跟自己行動。
幾個示威者開始圍著對他拳打腳踢了,志誠不敢看,轉身慢慢離開,突然,他發覺示威者的打鬥聲靜了下來,反而只聽到肥文的聲音。
壓在地上的肥文,不斷大喊著兩句令一眾圍攻著他的示威者,無比動容的的說話──「光復香港!時代革命!」「光復香港!時代革命!」
————
「光復香港!時代革命!」「光復香港!時代革命!」肥文眼有淚光,一邊掙扎,一邊誠懇地再說:「我係鬼!但我係警隊嘅鬼,我企响你地個邊!」
「你真係支持我地?」制服著肥文的示威者半信半疑,但他已沒有把肥文壓得那麼緊,肥文能夠轉身,把手伸進背囊,一邊說,一邊拿了一舊好像水壺的東西出來。「我仲扲咗呢樣嘢出嚟畀大家一齊用,我只係想扲返張委任證,我唔想比人見到我身份。」
志誠本身想讚美肥文還算有一點急才,能夠化解危機,但這刻志誠搖著頭,雙手抱著後腦,志誠不敢相信自己的眼睛,原來肥文還帶了手擲式催淚彈來打劫金行。
————
「警署嘅催淚彈仲多過廁紙,警隊一早就已經無mark催淚彈嘅數目,無人會知係我扲咗,大家可以隨便用。」肥文說。幾個示威者看著肥文手上的催淚彈,頓時眼有淚光,於是把他的委任證交還,「無問題,我地畀返你!不篤灰,不割蓆!」一位示威者激動的說。
這時候,突然有超過二十位防暴警察持著防暴盾跟警棍從北門衝入上水廣場,準備圍捕示威者。
有些示威者開始逃走,有些則開傘準備抵抗,環境開始混亂,幾個示威者定眼看著肥文,肥文明白他們的眼神所表達的意思,他們一眾需要肥文使用這個催淚彈,幾個示威者側身讓路,退了一道空位來給肥文助跑,肥文硬著頭皮,咬緊牙關,拉開手擲式催淚彈的保險環。
「肥文,唔好呀。。。」太遲了,肥文忘記了自己被除下了護目鏡和口罩,他充滿自信地大喝一聲,衝前跳起,在記者和警隊的眾目睽睽下,向自己的同袍,那些防暴警察們拋出了催淚彈。
甚至,連上水廣場裏面的大電視也因為播著新聞台,而直播了這偉大的一刻。催淚彈會過期,但這一幕,名流千古。
————
防暴警察配戴著防毒面具,呼吸沒有困難,但卻被肥文的催淚煙阻擋了視線,停止了衝擊。人群開始再度四散,慌亂危急之下,志誠只好自行逃跑,從地面的南門,跟著其他示威者逃去。
志誠暫時安全了,他慢慢走到彩園邨附近一條幽靜的橫巷除下所有裝備,從背包拿出金器,改用紙袋裝著金器,步行回家。
他知道肥文的下落並不樂觀,因為他已敗露身份,但志誠深信肥文雖然低能,但還算有義氣,理應不會把他出賣,肥文絕對可算是他的救命恩人。
志誠住在不遠的太平邨,他邊走邊估算著紙袋的重量,紙袋很沉重,但自己的心情卻放鬆,他知道自己把金器賣掉,便可以清還自己的街數,可以帶太太去一趟歐洲旅行,甚至還有剩錢租住豪宅,直至自己有宿舍為止。
他邊想,邊微笑著,不知不覺已上了樓,回到家門前。
他準備取出門匙,就在那一刻,他隱約聽到家中好像發出一些很歡悅的呻吟聲。
————
志誠拉開鐵閘,大力踢開木門,衝入了屋內,他在玄關位置踩到了兩雙男裝皮鞋,志誠已心知不妙,當他入到房內,眼前的景象嚇得他臉容扭曲,震撼了他的心靈,他看到的是,兩位上司,陳Sir和張Sir,赤條條的,在床上,一前一後,一起抬著志誠的太太。
「你聽...我地解釋...我以為你要OT...」陳Sir口震震地說。志誠發現她的太太,連內褲也早被脫下了。他拋下了紙袋到地上,不加思索,直接從腰間取出手槍,指著陳Sir及張Sir。
張Sir舉起雙手,哭著說:「志誠你冷靜啲,我地嚟係一齊做室溫瑜珈,我地係無接觸佢,只係你太太表現唔合作,响激烈掙扎下,先令到内褲鬆脫導致走光。」
志誠連轟六槍,轉輪式的彈巢足足轉了一個圈。
————
肥文在混亂之中被速龍小隊拘捕了,他跟其餘二十多個示威者,被帶到上水警署內熱得像蒸籠一樣的臨時羈留室。有警員通知肥文他已被落案起訴,成為了香港歷史上第一位被控告暴動罪的休班警。
羈留室內,有被捕者為肥文歡呼,然後大叫肥文是真正的義士,又有人感觸落淚,說警隊內原來也有白警。突然有一種莫名其妙的成就感,令到肥文沒有太驚慌,反而微笑起來。
幾個小時過去,未有示威者獲釋,反而羈留室內再增添一員,他是志誠。
肥文看見志誠被帶來,驚訝的問道:「你...都走唔甩?」
志誠呆了片刻,冷冷的道:「我開槍,隊冧咗陳Sir同張Sir ...」
在場的二十幾位義士,無不聽見志誠的說話,全部人驚訝得鴉雀無聲。一輪沉寂過後,有位義士開始喃喃自語,話語開始牽動各人,其他義士亦相繼開口,聲音哄動整個羈留室:「光復香港!時代革命!」「光復香港!時代革命!」
————
全文完
「我左眼見到鬼豪宅位置」的推薦目錄:
我左眼見到鬼豪宅位置 在 離奇家遮 Facebook 的最佳解答
(四十五)睇樓
咳咳咳,話說兩、三年前左右啦,小弟有次代客睇樓,係呀,你無聽錯,好多客人連睇樓都懶,佢地根本唔介意個單位係點,只要價好,有水位炒,就扑鎚OK。
d樓就係俾呢d炒家炒貴曬。搞到我地而家300呎嘅單位仔都要成5,6百萬,真係痴q 線。
燥左少少都要繼續講,d細價樓,兩房單位仔,呢d係民生嘢,大眾市民所須要嘅,你地班友要炒嘅就去炒豪宅,半山地段果d啦,搞到民生嘢真係好不該,賺錢都應該有返少少良知先得架嘛。
D 客而家愈黎愈趨向財大氣粗大支嘢,多多要求。果次,就係有個叫芳姐嘅熟客打黎,叫我上去一個單位到拍片佢睇,佢响洲際High tea緊,唔黎喇,總之快快手手拍好俾佢,叫我記得每個位都要影清影楚咁話。
哦…
如是者,咁我就自己上去啦。
個單位開價好平,因為業主想快手甩身,原因係,上手租客無L人性,不斷以毒招虐待屋企個印傭,又唔比飯佢食,又好似限佢每日只可以訓三個鐘等等,不時對佢拳打腳踢,結果,佢响屋企個露台跳左出去…
即係,23C係一個兇宅單位。
不過呀芳姐真係百無禁忌,仲糾正我話呢個極其量只係叫做半兇宅單位,因為,照佢講法,死者跳左出屋外,死嘅地方响一樓平台,唔係屋裡面,所以,空中飛人case只屬半兇宅。無事無事,佢有意入手。
顧客永遠是對的。
就係咁…
我自己拿住條匙,就上左去23C喇。
黎到門口,照例敲下門,扭下把鎖,講句:「打搞曬,黎睇樓架」咁就walk-in入去。
單位已交吉,無傢私,間隔四正企理,亦幾通風,其實感覺不差。
快手趕收工,拎起部電話開個 video mode就拍。
之前試過比芳姐屌過:「都唔知你拍乜九?邊到係房,邊到係廳呀?個鏡頭又郁黎郁去,鬆郁矇,點睇吖?你咁樣做嘢邊得架。」
我果時心諗。屌你啦,我做地產啫,拍得好嘅話我拍左套美人魚出黎啦。
自果次之後,咁我都學精左,一面拍,會一面加埋旁述响隔離。唔係一陣個客唔like 又要我白走多轉。
「大廳睇落四通八達,住落真係人都發達吖,抵呀,開價700萬,攞黎收租日日賺。」
「地版乾淨立立令,華麗轉身有靚景,身份嘅象徵吖!」
「好,跟住睇下個主人房,呢度放張雙人床,呢邊放個地櫃,Fit曬。」
「再黎睇睇個露台,可以掠衫又可以…」
咦喂!我眼花?
果一下,我窒一窒,响手機螢幕到…
見到有個女人,背住我,企左响露台出面。
我眨眨眼,拎開個電話…
無嘢。
都話眼花架啦。
繼續拍攝,拎返起部手機,影實個露台,再一次,我實實在在响電話螢幕裡面見到…
有個女人…
白色長裙...
企左响露台…
頭髮仲要好長,長到落腰左右。
我果刻真係嘩左聲出黎,拎開部電話,見到嘅只係空空如也嘅露台...
喂…咩料?
真係咁猛?
…唔係化。
我竭力鎮定自己,但係胡思亂想嘅想法硬係自己湧上心頭,我諗起呢度係一個兇宅單位,諗起曾經有個印傭係呢到跳左落去…
我吞吞口水。
响露台跳左出去…跌落平台…
大概就係而家我面前呢個位置…
骨碌…
算,傻的嗎,都係唔諗咁多。
正想走為上著離開之際,芳姐打黎,問我做咩無露台條片。
妖…
我嘆左啖氣,口中唯有係咁講住有怪莫怪有怪莫怪咁,搵食啫,硬住頭皮,再次打開個video mode,然後用手機慢慢對準個露台…
唔…
其實當時我眼球已經盡量唔直視個螢幕架喇…
咦!無事…
無嘢喎…
一切正常。
我呼左啖緊張悶氣,快手拍完,send比芳姐,轉身講句打搞曬,奪門離開。
入到𨋢,芳姐whatsapp 比左個留言短訊我: 「露台呢?你拍乜九呀?點睇吖?你咁樣做嘢我點比佣過你賺呀?」 。
我心諗,唔係化,我隻手今次好定架喎,仲要加埋旁白,應該好清楚先係。
於是,我自己click返條片睇一睇。
「呢個係露台,可以放掠衫架,仲夠位可以…」 聲音完全無問題。
之但係,個畫面前面好似有d嘢泣泣揚揚…
係一片紅色…
覆蓋住成個畫面…
就好似有一大片血肉哄左响鏡頭前一樣…
呃…
相信…
大家同我一樣,都明白係咩一回事。
嗱嗱嗱,做地產真係成日會撞到呢d離奇嘢,據我所知,呢排同行都好怕上石屎藏屍案果幢荃灣dan6 睇樓,聽佢地講,呢排架𨋢成日無啦啦停左響事發果層,唔郁唔剩,又有好幾次,話見到有個陌生男人係大廈裡面係咁問路,問人點樣出返去…屬真屬假,不得而知。但可以肯定嘅係,d炒家而家已經喉住呢個盤,準備好執平貨。
真無良。
真人視聽版:
https://www.youtube.com/watch?v=iLOgFc4NO7Q
利申:好多人問條片個主角係咪就係我本人,話佢幾靚仔咁。我重申,呢個唔係我,唔駛懷疑喇。不過,講返吖,我認為,我輕輕靚仔佢少少。
#真人真事 #離奇 #鬼故 #鬼 #靈異 #不可思議 #高登 #離奇家遮 #恐怖 #香港 #文字 #心靈 #電影 #短片 #睇樓 #地產