出賣老師系列。
當年我18歲，抱住有石內卜之稱嘅miss pang，last day影咗張相。佢鼓勵我追逐自己嘅夢想，喺佢嘅世史堂上，我可以明張目膽咁拎個枕頭出嚟瞓，佢會聽我講拍攝超級巨聲嘅事，亦都塞啲notes俾我應付a level。佢唔係特別錫我，佢個個都錫。佢會叫我哋自己得閒去吓64晚會，因為老師當時唔可以迫啲學生參與政治（btw依家啲老師會迫啲學生上國情班），亦都分享好多佢嘅睇法。對我嚟講，佢唔止係世史老師，佢係我人生教練。好多世史我唔記得啦，我淨係記得我買咗本簡體嘅菊與刀，到依家都仲未睇完，因為簡體我睇得好慢。最後我世史a level考得個E，但佢無嬲，佢仲讚我中文考到5星好叻。
身為老師，佢仲會好八卦我私生活，成日話我知我初戀嘅情況，問我會唔會復合。我依家想好肯定咁話佢知，有一個當我係公主嘅男仔同你一樣鼓勵我追逐夢想，只要佢喺身邊我搭巴士都瞓到流口水，而佢唔介意我三尖八角，亦唔怕我麻煩同懶，我考幾分都同你一樣會為我感到開心，miss pang，我諗我真係幸福。多謝你，教我無悔咁為人生努力一次，原來真係會得到意想不到嘅好嘢！
講咁耐，都係想同大家分享，一個好老師，係用生命影響生命，唔洗用成績分grade，亦無任何政治考慮，只要當你嘅學生係Harry potter，曳極都有佢存在嘅意義，我諗，學生搵到自己嘅價值，先係最重要。學生求死，唔單止係教育政策，定係學生本身有問題，每個持份者都有佢嘅社會責任，除咗家長，對得學生最多嘅老師都好重要，所以我好感激我人生中出現嘅好老師！多謝你哋改變咗我嘅一生！
#今日唔係敬師日 #但好感觸 #原來已經6年啦 #我都仲係齊蔭 #快啲同我分享你哋嘅老師係點 #好老師其實好多
