週五晚去左呢間以露營車為題嘅西餐廳，整體質素相當唔錯！
由於只有一位廚師，為左保持食物質素及穩定性，晚市只以私房菜形式供應，記得要預約。餐廳位置唔多，四四方方，裝潢簡約，但唔代表冇花心思，廚房外牆正正係露營車模樣，當然就唔係一架真嘅露營車。
枱布都用上必備嘅嘉頓式格仔布，加上旁邊嘅草地、帳幕牆紙、露營燈，可以輕輕幻想自己身處野外，環境舒服。冇浮誇嘅西餐廳佈置，直接反映喺價格上，合理非常。
當日我地食嘅係以魚為題嘅七道菜，作為唔太喜歡魚類嘅我，居然食得津津有味！
🔶意式香草包：餐包新鮮熱辣，配上四款橄欖油，包括：原味、迷迭香、蒜辣、黑白胡椒，加上黑醋。最特別係以試管盛載，食嘅時候倒出少少，沾麵包食。
香草包鬆軟，本來以為配以黑醋應該味道最穩陣好食，出乎意料我地都好喜歡蒜辣橄欖油，味道最突出，同香草包形成強烈衝突感。
🔶周打魚湯：廚師略作介紹，佢採用比目魚作材料，魚味香濃，唔腥之餘仲係鮮，肉質嫩滑☺️唔似一般西湯咁杰身，入口順滑，配料豐富，蘿蔔、芹菜我都吃光光❤️美中不足係魚骨未能去掉，飲湯若然要小心奕奕，未夠爽快。
🔶煎龍脷柳沙律：龍脷柳簡單用上鹽、胡椒醃製，輕輕煎過，魚肉嫩滑，表面微脆。凱撒沙律醬加上沙律菜，好新鮮，份量不少！
🔶鹽焗魚：廚師表示呢味用上紅友魚，經過多次測試最適合鹽焗，最能保留肉質鮮嫩及肉汁。紅友並冇事先去麟，以蛋漿加鹽包住成條魚焗至金黃，難怪上枱聞到強烈蛋香。
廚師幫我地輕輕分拆，令我諗起潮州鹽焗烏頭魚肉紮實，當然肉質點都唔及蒸魚滑溜，但都唔會鞋口，而且保留魚汁、魚油，加上冇添加額外調味，食到魚嘅原汁原味。
魚麟有助阻隔鹽份滲入魚肉，魚肉內嘅檸檬相信都對辟除腥味起左唔少作用，既唔鹹更加唔會腥❣️
🔶煎三文魚柳：三文魚柳以薰衣草香料醃製，味道唔算好香濃，帶淡淡薰衣草香。三文魚煎得恰到好處，皮脆肉嫩，沾上少許荷蘭醬減輕油膩。伴菜有蘆荀及自家製薯蓉，入口細滑。
🔶蕃茄磨菇薄餅：薄餅餅底自家搓製，加入香草，配料簡單鼙加入蕃茄、磨菇。雖然薄批底夠脆，唯茄醬唔多，食落較淡，磨菇份量較少，口感一般🙊
🔶意式奶凍：建議由味道較淡嘅奶凍開始食，奶凍滑溜，口感結實，奶味香甜，唔會覺得膩❤️
🔶焦糖燉蛋：焦糖薄薄一層，燒至香脆，甜度適中。唯燉蛋唔夠滑溜，食到有少許糖粒，跟廚師反映過，相信會作出改善調整。
廚師仲為我地送上一客自選海鮮配料意粉，佢地名為「車仔意粉」，以車仔麵概念而生，客人可以自選兩款配料，包括海鮮、蔬菜、肉類，並以全橄欖油即製，平日午市供應，連同餐湯、冷熱飲品，竟然只售$40！意粉煮得剛好，唔會腍身，而且份量唔少。海鮮絕不馬虎，青口大大粒，帶子爽口，所版呢個價錢真係超值。
整體黎講，我地非常滿意呢餐晚餐，以人頭三百蚊，食到七道菜，實屬超值。
雖然冇高級西餐廳嘅裝潢，卻有水準菜式，加上服務一流嘅廚師、店員，話係達至酒店水平亦不為過。
細問之下，原來廚師曾經從事酒店業，經過七道菜，我地都感受到佢對食物、服務有好高要求，認真看待客人，重視意見，相信日後再黎，定必一樣滿意。
-
Acapella
地址：觀塘成業街19-21號成業工業大廈4樓406室
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
.
.
.
.
#hkdessert #hkig #hkfood #hkfoodpic #foodporn #foodiehk #hkfoodgram #hkfoodblog #foodblogger #foodaholic #weekendhk #instadaily #instafood #foodoftheday #hkfoodie #hkgirl #食評 #吃貨 #好西 #相機食先 #手機食先 #全力食 #一路食一路post #acapella #觀塘 #工廈 #西餐
