*嚴禁劇透*
*粗口自行過濾*
*可瘋狂話戲屎但免外表批評人身攻擊*
[1230隔夜超短劇評][TVB][鐵探EP07]
[讚] 唯唯繼續搶focus，喺醫院草地快活谷對垶sir講晒做UC嘅遺憾嗰段做得好。不過真係好可惜，應該分開咗take而啲情緒位最後接唔到，扣咗分。另外，不停flashback都好阻住我睇兩兄弟嘅感情戲，啲片段全部都播過喇，亦都冇新嘅事交代，真係多餘。
蔡思貝真係每次睇都有進步，由等出院到遇到Matt sir開始攻勢，再到佢自己發夢都好睇。楊明做呢啲優柔寡斷男係好出色，所以真係覺得阿招好慘，搵埋條命出嚟畀Matt sir，但就因為Madam Man話handler同UC有感情係唔專業而唔接受阿招，睇到火滾。
阿招發夢再穿去垶sir發夢，兩個都有創傷後遺，呢個位接得順，舒服。
[彈] 招Matt、谷垶、垶怡，三段感情戲，再加鏹水追逐戲，另加少少Bingo查山狗嘅幕後指揮，今集個重點唔知喺邊，當然冇重點都得，但幾段戲都要有啲睇頭先可以支持到全集，今集我睇完招Matt已經好眼瞓。幾段係得招Matt實淨啲。谷垶就如上面所講，本來應該幾好睇，但畀啲flashback破壞晒。垶怡嗰段袁偉豪、王君馨嘅語氣語速情緒都差唔多，照計就算阿怡冇氣冇力，都可以設計一兩吓晴晴畀啲活力可愛嚟，中和吓個慢節奏，不過冇咁做，所以呢段一長就覺得好悶，或者可以剪快啲佢哋酒吧嗰段，快啲去到結婚因為捉賊，仲要係捉阿怡阿叔而最後冇註冊，咁就應該好啲。袁偉豪中咗槍做咗兩次頭部大手術，演到有氣無力係應該嘅，不過剪接同埋設計應該幫吓佢，依家幫唔到，就變到成段都悶。（各位爸爸媽媽，千祈唔好學佢哋兩公婆咩都喺個女面前講呀。小朋友唔係傻，識聽呀）
淋鏹水疑犯，即係嗰個黑工被追時，跳上牆再跳返落嚟嗰吓真係多咗。我知我明，好多香港經典動作片都有，成龍仲跳過去二樓同埋巴士頂。但呢個時代真係仲可以咁樣硬插一個show off位落去套劇度咩，成龍都戲都有鋪排啦。我覺得唔okay。如果真係要設計呢啲動作，不如畀啲之後仲有戲嘅演員做啦…
[演員表] 惠英紅 飾 萬晞華 / 袁偉豪 飾 尚垶 / 姜浩文 飾 游秉高 / 蔡思貝 飾 招喜悅 / 王君馨 飾 楊曉怡 / 許紹雄 飾 簡國曙 / 楊明 飾 邱勵傑 / 梁競徽 飾 谷永正 / 林偉 飾 山狗 / 林利 飾 大威 / 方紹聰 飾 發瘟 / 盧宛茵 飾 張麗嫻 / 泰臣 飾 嚴世孝 / 謝可逸 飾 老總 / 謝東閔 飾 陳國城 / 余德丞 飾 莫世超 / 張寶兒 飾 程美茵 / 潘姿善 飾 尚晴 / 洪永城 飾 邱勵進 / 石修 飾 郭展亮
#1230隔夜超短劇評 #無綫 #TVB #鐵探 #惠英紅 #袁偉豪 #姜浩文 #蔡思貝 #王君馨 #許紹雄 #楊明 #梁競徽 #謝東閔 #余德丞 #張寶兒 #潘姿善 #林偉 #林利 #方紹聰 #盧宛茵 #泰臣 #謝可逸 #洪永城 #石修
