哮天犬求偶記（上）
大家好，我係楊戬。
大家都知道，我有一隻哮天犬，威風凜凜、忠心耿耿，絕對係居家旅行、斬妖除魔嘅最好伙伴。
但近年四海昇平，各地都冇咩厲害嘅妖魔鬼怪，正所謂飽暖思……愛情，哮天犬開始向我投訴，要我幫佢搵女朋友。
咁我都明嘅，幫狗結紮，或者幫狗擇偶，都係狗主嘅責任。
幫哮天犬結紮，我諗都冇邊個獸醫夠膽做，所以我開始幫佢搵女朋友。
我本來以為呢件事好簡單，咪搵隻靚靚女女嘅母狗囉。
點知，我連續搵咗幾十隻狗，哮天犬都唔滿意。
我忍唔住問：「喂，你有咩唔滿意啫？啱啱嗰隻毛色幾好啊。」
「毛色幾好？」哮天犬嬲到成隻彈起：「我英明神武，你想隨便搵隻平凡嘅母狗，就襯得起我？」
唉，問題係，其他天庭嘅同事冇養狗嘛，佢哋有人養金魚，有人養牛，就係冇人養狗。
專業問題就交番畀專業人士解決，我就去咗搵天庭嘅Speed Dating公司。
經理答：「我哋冇幫動物做開……」
「乜嘢動物？我都係神仙嚟！」哮天犬抗議。
經理一臉為難，係啲File度搵咗好耐，最後居然眼前一亮：「介紹個明星畀你識。」
嗰隻狗叫Lady，做過迪士尼《小姐與流氓》嘅真狗版女主角，絕對係國際級狗界明星，美貌方面絕對冇得彈。
Lady至今單身，公司都幫佢介紹過幾隻狗公，但Lady全部都睇唔上眼，話佢哋太普通。
我一拍大腿：「咁就啱啦，哮天犬都係獨一無二㗎。」
於是，我哋馬上安排哮天犬同Lady約會。
約會嘅過程我冇參與到，廢事佢哋尷尬啦。
但總之，哮天犬返到嚟，一臉失望：「太平凡啦，唔係我要搵嘅伴侶。」
我難以置信：「明星嚟㗎喎，你都話太平凡？」
「我跟咗你千幾年，喺你心目中，我就係咁膚淺嘅狗咩？」哮天犬強調：「我要搵嘅靈魂伴侶，唔係剩係一個交配嘅對象。」
哮天犬繼續講：「愛情要有精神嘅共鳴，我覺得愛情嘅最高境界，就係唔駛開口，都知道對方諗緊乜。」
「你哋先第一次見面，點會咁快到達呢個境界。」我提醒佢。
「我問Lady：『你諗緊乜嘢？』佢答：『諗緊今晚食乜。』我問：『你最深刻嘅經歷係乜嘢？』佢答：『食咗一碟好好食嘅和牛。』」
哮天犬神情無奈：「我想搵嘅係靈魂伴侶，但佢無靈魂啊。」
我呆一呆。
哮天犬嘆氣：「我都一千幾歲啦，經歷過咁多嘢，思想比人類更成熟。Lady再靚，都只係一隻幾歲嘅狗，普通狗同人……或者普通狗同仙人，係溝通唔到嘅。」
「所以你想搵人嚟做女朋友？有物種差異喎。」
我再諗一諗：「又唔係唔得嘅，嚴格嚟講你都係仙人，唔算係狗。」
哮天犬意興闌珊：「算啦，可能我命中注定，要做一隻單身狗。」
之後，哮天犬冇再催我幫佢搵女朋友。
但睇住佢日日悶悶不樂，連心愛嘅骨頭都唔想咬，我又好心痛。
話晒都係我嘅愛犬，佢難得有一個心願，我點都要幫佢達成。
於是，我捉住哮天犬，要佢苦練變身成人嘅法術。
下集：https://bit.ly/34f12ka
將專頁設定為「搶先看」/ "See first"，最新故仔馬上睇！
鼻鼾密碼：https://goo.gl/LHHKyJ
我嘅職業係：都市英雄：http://bit.do/eTEQn
#短故 #短篇 #小說 #陳美濤 #廣東話 #粵語 #tomatochan #哮天犬求偶記
變身怪醫小說 在 變身怪醫的創作背景與特色(擷取自PAR 表演藝術雜誌)... 的推薦與評價
過往有許多以主角具多重個性為題材的小說戲劇，唯《變身怪醫》Jekyll & Hyde把這個構想推到極端.... TW.NEWS.YAHOO.COM. 人性中善惡的強硬 ... ... <看更多>