【這是你所想的生活嗎?】
一直好多人都同我講,不如搵份穩穩定定冇咩做嘅工,終於疑似搵到咗,簡簡單單、唔會有太大壓力、冇咩明爭暗鬥、同事關係都和諧,生活都好似過得唔錯咁,但你總係覺得,好似差咁啲咩,都自知未必係自己想要。
或者你習慣咗以前生活係忙到打仗咁,你會有十萬個task等住你,你一直以嚟學會嘅係超越Multi-tasking嘅工作,幾乎係Infinitive-tasking;因為每份工極唔穩定,一個月炒team人正常不過,為鞏固個位,你唔玩明爭暗鬥都迫住要玩... 當你習慣咗呢種生活,突然原來「穩定」都唔係你想像中咁美好,有時,你會好lost唔知做緊乜。
返工唔知做乜、放工唔知做乜、weekend唔知做乜、放假唔知做乜…… 真心,你以前會好期待放假去邊玩、有咩做,依家你都開始迷失,其實放假唔知可以做咩,原來都幾迷失。然後,收工不如紅隧口落車行返屋企,反正你唔知可以做乜;你收入可能係以前幾倍,但除咗儲錢以防下一次失業,原來你都係唔知做乜。到最後,似乎做咗自己最睇唔起果種人,一味得個穩定冇目標可言嘅人。
唔好,我唔想咁。
以前你應該quit咗十世,咁嘅時勢,全香港所有行頭公司都俾你見曬,唔止一次,呢幾年嘅經歷,嚇怕咗你;以前明爭暗鬥唔係你死就係我亡嘅日子,令你明白多一事不如少一事,事不關己唔好r嘢做、同事之間唔好講咁多深刻嘢自己嘅私事,你已經唔會再相信有真正情誼,會唔會有朝一日又反目成仇,又或者講,生活平淡至此,都冇咩好講。
對比以前,你唔算唔開心,終於俾你過到呢種從未試過生活,唔駛擔驚受怕聽日會唔會失業、唔駛慳住食少一餐儲得幾十蚊得幾十蚊,都唔駛為慳幾毫子身水身汗行幾個巴士站為分段收費,你或者要珍惜。只係日子日復一日如是,又變咗冇乜感情起伏可言,都唔知叫開心定唔開心。人大咗,開始唔會有咩朋友,你收工想搵個人食個飯吹下水都已經唔會有,唯一期待,係Netflix有乜新劇上架。
呢排成日發夢,夢見以前喺迪士尼實習嘅日子,夢見同同學收工就去玩、夢見同各國同事圍埋一齊食飯吹水、夢見同朋友一齊煮飯... 果種感覺真實到你以為自己真係喺美國,醒嚟都唔想接受自己生活咁混沌。成日話,果段日子,係我人生中最開心最無憂無慮嘅日子,呢段回憶徹徹底底深植喺我腦海入面。唔知係咪最近生活太平淡,潛意識好想返返以前,夢見呢段記憶,有時起身總會不自覺眼濕濕。
我間中會諗,個人變咗咁係咪因為疫情?以前有咩唔開心,去個旅行能醫百病,依家冇咗;以前唔開心咪去酒吧飲杯嘢,依家十點後你點都要走;以前失業有咩好怕,經過舊年後你知道,失業最可怕唔係冇錢,而係你每一日都唔知可以做咩,精神折磨先最惡夢。
慢慢,你發現自己搞唔清自己想要啲咩,失意漂泊時曾經同自己講穩定落嚟也不錯,但當你穩定到而又高不成低不就,生活平平淡淡,又發現原來冇乜動力。
到最後,你自知道唔關疫情事,而係到今日,一直都仲未搵到適合自己嘅路。既然一切依舊茫然,不如安定住先。平淡有收入,總好過平淡冇收入。
去旅行我好鍾意望到呢種藍天白雲,我好鍾意影低不同形態,估唔到香港難得望到,竟已唔係一種攝影衝動,而係俾到一種自由嘅感覺我,抖一啖氣繼續上路。
諗起電影《幸福路上》嘅主題曲歌詞:
//成為了你理想的人了嗎,那故事後來有什麼留下... 我又是誰,我卻說不清楚//
共勉之。
✨ 網店正式開張!新張期內貨品低至$5!請即睇:https://bit.ly/3qLPkpk
📣文字工作者也得要吃飯,你的支持是我的原動力。請給點心意,給小弟寫更多好文章,歡迎透過payme課金以作支持🥳:https://payme.hsbc/jackyhei
或使用QR code:https://bit.ly/3a9wOzy
或透過Paypal捐款:paypal.me/jackyhei
🙏感謝各位支持,小弟執筆之原創小說私人貨存已全部售罄,有意者可到此文章內的連結購買:https://bit.ly/3dRuUWu
【IG請follow】www.instagram.com/travelerwithmovie
同時也有2部Youtube影片,追蹤數超過60萬的網紅飲食男女,也在其Youtube影片中提到,寧做小生意不批貨 西灣河老麵廠誓保質素:要維持客源唔可以偷工減料(足本版): http://bit.ly/2RvZvhl 山竹走了,香港仍然颳大風;股市不能停,搵路趕返工,賺錢「重要」過天災。西灣河有間老麵廠叫春記,口碑載道,老闆偏偏將生意愈縮愈小,每日打麵兩三種,只做零售,門市中午12點就拉閘...
返工 唔知 做咩 在 Facebook 的最佳解答
睇見隔離 英格蘭中部全職煮婦 寫左一篇文,講「專業人士走去做低技術嘅工作,一啲都唔勵志」其實我覺得好合理。律師、醫生、建築師等等的專業,需要社會大量的資源去栽培,佢地去到英國如果係為勢所迫從事低技術工種,是明顯的人力資源錯配,除了左膠會覺得 #好勵志 之外,直接的結果就是造成社會的損失。
好可惜,正正係事實嘅 #唔勵志 三個字,觸動了不少人的神經,然後上綱上線地將佢打成「唔知憑咩就用職業或收入去睇唔起其他人」,然後腦補對方會在coffee shop歧視送貨司機,嗯… 好一個 #facebook傳心師,睇一篇文就會知道人地去coffee shop會點。
然後呢?繼續塞字落人個口。明明全職主婦篇文,只係講「唔勵志」,但Facebook傳心師就自己加「失敗者」三隻字落去。喂大佬,唔勵志唔等如係失敗者架嘛?唔勵志也可是一個個平淡無奇的生活故事啊,全球幾十億人,係咪人人都要勵志,否則就係「唔勵志失敗者」?正如我話 #TA姐 #冇身材,唔通你又要腦補我係話緊佢 #冇身材做野三分鐘熱度鍾意認屎認屁迫人like佢facebook擺低個袋扮返工? 我邊有咁講姐?請大家唔好誤會囉~
講到 「職業無分貴賤」,我想問你網友 #陳duck刪 日日鬧我去 #做鴨 嘅時候,你唔教化一下佢:英國性工作者係合法係正當職業?佢日日講佢老公係 #白人公司 度 #做manager ,又係咪睇唔起其他做唔到「白人公司」嘅manager嘅人?佢自己打份工轉黎轉去,又嫌人地個title羞家,自封 #化妝師、#整餅師,又係咪「職業無分貴賤」嘅表現?如果每份工都無分貴賤,佢又做咩事要唔做 #整餅師 aka 拖地女工?佢講到自己好鍾意烘焙架,點解唔 「收入大減但樂在其中」?係咪佢白鴿眼見到旁邊的工廠女工「面有鄙色,不恥為伍」呢?佢都好勵志咁成日轉工,但無份做得長,咁算唔算 #勵志失敗者?
最後,所有「職業無分貴賤的支持者」,我衷心祝福你未來可以早上做 #行乞師、晚上執垃圾做 #拾荒師,凌晨學我咁去 #做鴨男技師,職業無分貴賤嘛,對不?
#到依家我都唔明點解成日話大陸啲退役運動員慘
#街頭雜技師很失禮嗎
#娜娜又何嘗唔係一個輕舞飛揚自力更生的職業女性
#我唔明點解香港人咁憎佢囉
#職業無分貴賤嘛
#左到盡頭便是膠
返工 唔知 做咩 在 我從九龍半島搬到法羅群島 Facebook 的最佳貼文
最近好努力工作,天未光就返到麵包店返工。大地之子每日負責接送燒賣到托兒所。以前燒賣哭鬧,總是要搵媽媽抱抱,或者啜一啜奶,就唔喊啦。幾個月前,燒賣戒左奶。每日對爸爸嘅時間比較長,好似慢慢唔似以前咁需要我。有日同大地之子接燒賣放學,我同燒賣講:拖住媽媽。燒賣擰擰頭:跑向大地之子,然後講:拖爸爸。見到我心都碎了。
終於等到放兩星期假,本來滿心歡喜帶燒賣到英國,坐飛機、雙層巴士、坐火車、去動物園,不過航班突然取消,失望左幾日,更想過取消假期,繼續返工就算。不過大地之子極力阻止,覺得我需要亦值得一個假期。
於是,就這樣,來到假期尾聲。
呢兩星期,每日24小時陪住燒賣。坐唔成飛機,帶燒賣坐輪船;坐唔成雙層巴士,有一日我地隨便登上一架巴士,漫無目的坐左三十分鐘;去唔成動物園,就買左個二手農莊玩具畀燒賣。假期無做咩特別嘅事情,每日唔係去公園就係去足球場,偶爾到泳池游游水。但係燒賣每日都好開心。小朋友嘅世界好純粹,有片草地,好似已經擁有全世界。
今日法羅落微微雨,燒賣突然講wing wing go 呀way,一開始唔知道佢講緊咩,然後仔細再聽,原來佢唱緊:rain rain go away。我地行到停車場,佢又指住一架黑色嘅車講:巴啦k(black)然後又指住啲草講:綠色草草。我好興奮同大地之子講:嘩,個仔大個左好多,突然間識好多野咁。大地之子不以為然:佢之前唱過啦。燒賣並唔係兩星期突然長大,而係每日都改變成長中,每眨一下眼,佢都唔同左。而我一不留神,就錯過左,好彩有呢兩個星期假期,多返時間陪燒賣。
今日行行下,燒賣突然要我抱。當時我攞住一大袋游水用品,我叫大地之子抱,燒賣擰擰頭:媽媽抱。我即刻將啲膠袋隊晒畀大地之子,然後抱起燒賣,再向大地之子露出一個勝利嘅笑容😏😏那個需要我嘅燒賣又回來了☺️☺️
#siumaiismybab
返工 唔知 做咩 在 飲食男女 Youtube 的最讚貼文
寧做小生意不批貨 西灣河老麵廠誓保質素:要維持客源唔可以偷工減料(足本版): http://bit.ly/2RvZvhl
山竹走了,香港仍然颳大風;股市不能停,搵路趕返工,賺錢「重要」過天災。西灣河有間老麵廠叫春記,口碑載道,老闆偏偏將生意愈縮愈小,每日打麵兩三種,只做零售,門市中午12點就拉閘。
行家笑春記人懶不進取;「咁辛苦做咩啫?第一,交畀人嘅貨價可能係現在賣嘅三分二;仲有,我質量可以提升多啲,做好啲;如果交畀人要淋淋聲做完淋淋聲起貨。」第二代掌門五哥樊容強心水清,腆着大肚腩哈哈哈,十足一尊笑佛。
「禾稈冚珍珠!」慕名首次來到春記麵廠的人,可能有此一嘆。幾百呎小廠躲在靜靜的興民街,附近佔了一半是車房;門面殘舊,小趟門僅夠一人通過。但見不時有客擠進來五包十包的買麵:四位老太太似小學生在起哄,「我哋平日帶車仔嚟;今日無準備,行到呢頭又忍唔住。」金蘭姊妹分別住北角、將軍澳、何文田和元朗,你買我又買。有靚女長居法國,離港之前來買麵,他朝解鄉愁。
曾經有個在美國開旅行社的熟客,叫春記做一個貨櫃的麵,拍心口有本事賣晒。「一個貨櫃?我一年都做唔到喇!一個星期我都只係做幾百斤麵。一包麵粉50磅,一個貨櫃放麵粉800包,放幾多麵我就唔知。」五哥耍手擰頭笑騎騎。
時間 磨出來的細緻
春記貨種不多,蝦子、瑤柱、魚蓉……乾麵類六七款,濕的有生麵(雲吞麵)、上海麵、雲吞皮等,每日只做兩三款補貨。五哥指出,每星期做三兩包麵粉的生麵、三兩包麵粉的上海麵,蝦子麵做到七八包麵粉,「如果你唔係自己鋪,咁樣根本唔夠皮。」
雖然貨量少,他依舊每朝凌晨五點回來打麵。為何不多睡兩句鐘才開工?「麵呢,做嘅時候要等佢(成分)去混和,我哋行內叫做『行吓佢』,放一放先轆,放一放先執,咁係最好嘅。」他晨早打好麵,弟弟樊容坤(七哥)七點多現身,順道速遞早餐,去門市開檔回來正好執麵。
身處橫街,門面欠奉,七哥明言全靠「老主顧」支持,「人哋話你嘅麵好食,證明你嘅出品受人欣賞。(做麵)回報你嘅,唔係一包麵嘅價錢。」七哥滿足道。
五哥強調:「維持到客源,就係不偷工減料。就算有靚材料,你偷咗工都一樣死。」譬如他做掛麵,人家「夾」麵一次、轆(壓)兩次;他就夾兩次,轆四次五次六次,「如果一次過壓得夠薄,條麵唔好食嘅。轆多一兩次,麵會滑溜啲。」慢工不一定出細貨,但要細貨,不得不磨時間。當中沒秘訣,行家也知,但知不等於做,尤其趕急大量出貨的。「我不是經常做,時間耐啲,無問題,慢慢做。」工序在意,客人評價五哥一樣在乎:「你賣一樣嘢出去,個客返嚟一句說話:你啲麵唔得噃上次咁樣,你就成晚瞓唔着。」
機器 取代不了經驗
有50年,春記都用蒸籠明火蒸麵、焗麵。大約十年前傳出發展商意欲收購興民街的舊樓,所以兩兄弟一直沒有更改生產設備;然而,五年前去到討價還價的階段,收購重建無疾而終。兩年前,乘着配合屋宇署的要求,他們花了三四十萬重新鋪水鋪電,廚房改了電的蒸櫃和焗爐,走進「現代化」。
「現在蒸一車麵23分鐘。以前朝早蒸到夜晚五點,執一次麵就要去蒸,之後要焗,將啲麵調嚟調去,一日搬到黑。」五哥說。
那次大裝修,舊物只剩一紮古董竹片,父親用過,今天韌性依然,好晾掛麵。竹昇和蒸籠都沒留下來,倒是夾麵機壓麵機從父親年代服役至今,一開動就嚓嚓投訴,零件換了好幾次,就是捨不得丟掉換上先進的。
機器省了力氣,但做麵仍要靠經驗,例如大部分麵款都要落鹼水,多少有別,醒鹼時間也不同,五哥製作七哥出貨都了然於胸。水分也要掌握得好,例如做掛麵只有麵粉和水,太濕麵不好吃;太硬,麵就易斷易碎。所以,打麵前,要磅準水量,「如果你斷估倒水下去,多時加粉,少時又加水,加來加去,打麵桶愈打愈熱,麵就放唔耐。」
打瑤柱麵剛相反,成分有瑤柱汁、瑤柱蓉、蛋、麵粉、鹼水等比較複雜,最初未知濕度硬度,所以要慢慢加水,一邊打麵一邊去用指頭感受判斷,「倒水太多就死喇,你再加麵粉就稀釋咗裏面嘅材料,瑤柱味淡口咗。」
蝦子麵瑤柱麵比較受歡迎,他們每個星期都做;但掛麵就得看天時,「如果大北風嘅時候做,呢刻掛上去已經攣晒,賣相唔好;如果南風天,掛兩三日都唔乾又驚佢發毛。」打麵,並沒有一條方程式,唯有歲月造就的敏銳。
追數慘過借
春記在1965年由父親樊春創辦,1975年前搬來現址,一度是東區雲吞麵鋪、酒樓的供麵大戶,遠至灣仔也交貨;單是打麵師傅就請了五六個。五哥有八兄弟妹,除了萬千寵愛的小妹,七兄弟自小就在麵廠幫手,但繼承衣缽的只有老五和孿生細佬老六以及老七。「中學讀唔到書就跟老竇做囉!」五哥笑。
「老竇等師傅收工就教我哋坐竹昇、打麵。」七哥邊說邊回味怎樣將一塊厚厚的麵糰「坐」成薄得透光的雲吞皮。
97年老六移民波士頓,老師傅一個個告老還鄉,最後只剩下五哥和七哥兩個人。五哥回憶:「以前做生意比較困難,人哋幫襯你係好事,但數期長,周轉比較困難,你要找數畀人,夥計又要出糧。後期都係唔好喇,索性做少啲。」
「追數慘過借!」七哥搭訕。
98年五哥正式接手後,只交貨給準時出數的兩三家;四年前乾脆停止做批發,「自己賣算數」。門市就在百步之遙的西灣河市政大廈,正午12點便收鋪,客人要買麵就得移步興民街麵廠。「下晝唔開檔,因為粉麵客人通常上晝買,夜晚食飯煮餸;下晝生意額都唔夠請一個女工睇檔。」七哥道來原委。
簡單 也美
兄弟倆只差兩歲,五哥滿頭灰白,七哥無染髮也烏卒卒,完全不似59歲。
「佢以前多嘢諗。」哥哥是麵廠持牌人,打頭陣,傷腦筋。哥看弟「漏氣」,弟看哥「心急」;不過二人拍檔幾十年,早明白「如果人似我除非兩個我」,「一人少句就無事。記住,你一嗌交就散檔。」五哥笑得瞇起眼。兩兄弟都是健談之人,可是在麵廠各有專注,大多靜靜地做,任由收音機大聲播。
「我14歲開始做,現在兩個膝頭痛,痛咗幾年啦。」61歲的五哥看了醫生,說是勞損。幾十年來他日日搬麵粉、抬又濕又重麵糰走來走去,不離開崗位關節炎難緩解。七哥一樣腳痛,因為「坐喺度執唔到麵」,每日執麵,一站就是七句鐘。
「我希望65歲可以退休。」哥說。「佢四年後退休我都要退,一個左手一個右手,佢做前半部,我做後半部。」弟應。麵廠少一人都不能運作。
春記有歷史有口碑,可產量少。行家都說他兩兄弟懶,不思進取。七哥一笑置之:「錢,使到嘅就係你嘅財產;你唔用嘅就係你嘅遺產。搵到兩餐,唔係夠囉!」收工和朋友打一場波,或者在家搞吓電腦又一個晚上。
五哥點頭同意:「以前做批發一年最多休兩日,現在可以休十日八日。」自給自足,沒有交貨壓力,他整個人輕鬆了,回家飲杯冰凍啤酒,睇日劇、藍光影碟,有時煎一塊靚牛扒,已經樂透。
開心,可以好簡單。
採訪:韓潔瑤 拍攝:梁偉德
春記食品製麵廠
門市地址:西灣河市政大廈一樓D126號鋪
麵廠地址:筲箕灣興民街30號
電話:2560 5144
===================================
立即Subscribe我哋YouTube頻道:http://bit.ly/2Mc1aZA (飲食男女)
新店食評,名家食譜,一App睇晒!
立即免費下載飲食男女App: http://onelink.to/etwapp
《飲食男女》Facebook:http://www.facebook.com/eatandtravel
飲食男女網站:http://etw.hk
Follow我哋Instagram,睇更多靚片靚相:http://bit.ly/2J4wWlC (@eat_travel_weekly)
![post-title](https://i.ytimg.com/vi/wM8bIczRcRE/hqdefault.jpg)
返工 唔知 做咩 在 新青年理髮廳NewYouthBarbershop Youtube 的最讚貼文
Subscribe 新青年理髮廳: http://goo.gl/r71l5k
新青年理髮廳facebook page:
https://www.facebook.com/newyouthbarbershop
導演 陳列瑟
攝影 李刀拿
演出 陳發叔 陳同學 區同學
義氣仔女 Christy Mo
友情客串 陳軒
特別鳴謝 Chan hoi yan Helen YauTiffany Tsang Hoi KLee sze nga
一眾香港仔之友
────────────────────────────
我成長的地方是最美麗的,
純粹因為我在長大的時候遇上。
去到再遠的世界我都會想起這裡。
我當然都會大個,
香港仔,我希望你不要改變到我不再認得你。
────────────────────────────
《香港仔》
曲:新青年理髮廳
詞:新青年理髮廳
編:新青年理髮廳
我朋友中學時代 就喺鴨脷洲長大
而家下個個大晒 反而唔太想大
東村西村 跑落海怡 會經過大街
鴨脷洲唔算大 不過以前已經係我地全世界
嗱嗱嗱 鴨脷洲個「脷」字唔好寫錯
全部都有淵源 唔識記得要寫過
呢個咁嘅小島 你都未必知道
佢擁有全世界最高 嘅人口密度
穿過鴨脷洲大橋 掟個彎就到黃竹坑
家下家家戶戶都搬晒上半山
唔好誤會 只不過係搬晒上石排灣
以前姑媽住喺黃竹坑成街都係小販
間唔時仲會一家人去海洋公園玩
而家海洋公園都好少去 唔係我地去
生日嗰日免費或者可以諗諗佢
住得喺香港仔 做咩都要出銅鑼灣
咁唔行香港仔隧道 唔通爬過座山
講到呢條隧道幾時會塞 我地就最有心得
返工時間佢會塞?佢未必塞
放工時間佢實塞?佢都未必塞
無錯佢就喺你最趕時間最心急嗰陣先塞
日日都間歇性封閉
咁不如索性將佢成條荒廢
不過都唔好制
第時有左地鐵可能更加濕滯
沿住地鐵沿線 全世界都要改變
話就話幫你改善 趕走左你先
周圍拆呀拆呀拆 拆到一撻撻
條馬路窄呀窄呀窄 有咁窄得咁窄
起酒店servce啲客 趕走啲阿婆阿伯
食肆又拆無野喰 深灣船廠嗰邊喺樹放火靠嚇
卒之拆到個世界無晒性格
一住住左廿幾年 萬一要搬都唔知點算
一條村最緊要 要有啲公園
你老未 你未老 所以你未必知道
緊要有啲細路 仲要有啲兩老
拖下手仔散步 噏下呢呢路路
嗰啲環球店鋪 根本唔需要響到
如果我想買野 我自然會出軒尼斯道
呢到以前唔係咁架喎
定係 我地大個左?
![post-title](https://i.ytimg.com/vi/5AFiHEsonKI/hqdefault.jpg)