讀者投稿《雀后奶奶篇》
話說結婚前我99成日在好多人面前講話唔會要啲仔嘅女朋友或新抱洗碗，好似好開通好識做咁，所以結婚前我都對99樣樣做足，會電話問候下，過時過節送下禮，陪佢打下麻將（只係鄧下腳），當然仲有爭洗碗。最勁係我結婚嗰晚99致詞，講到會當我女一樣用個心錫我待我如珠如寶（其實之前好少見），差在未聲淚俱下，攪到我即刻在台要講聲多謝「媽咪」！
結婚後搬咗新屋，知99怕新年要整嘢，我同老公也喜歡熱鬧無所謂，就叫了親戚初二上我家打邊爐唔洗99攪（其實年年都只係食盤菜，糕都無）。佢哋年年都二三十人不過新年高興唔緊要，一早預好食物飮品同八底糕，仲攞定假嗰朝一早去買餸。點知過年前先知有咗，唔好意思推，我就大住個三個月嘅肚一早同老公去街市搶餸，無錯，係搶，因為初二好少檔開，然後返家洗呀洗，開定兩枱麻雀俾6299三姑六婆姨媽姑姐。
終於佢地瞓飽三點殺到，我禮貌地問佢地食咗嘢未，煎啲糕俾佢地食，我99即答話飲飽茶上嚟唔洗整，我當然識做叫佢哋打下牌先，跟住走入廚房煎糕。估唔到呢一入，仲慘過入咗豪門…啲人大大細細陸續嚟，我一路煎，聽到出面啲人猛讚我媽整嘅蘿蔔糕好食，我又再煎，又話其他糕都好好食（好似未食過美心咁🙄），我老公不停拎返啲吉碟入嚟捧糕，話未放低已無哂，於是我又煎煎復煎煎…
令我有啲感動係我99開頭係有入過厨房問我打唔打🀄️，我好客氣咁話你贏多啲啦，佢亦回咗我一句一陣俾你打，點知跟住就問我有乜嘢飲，我心諗原來招呼唔到，我老公都忙到唔得閒理佢。雖然當時我仲係好天真好儍，但都知99坐咗落去點會起身呀，finally,總共煎咗5底糕，仲有三底剩，點解，因為成七點我要預備打邊爐啲嘢。
當我幾個鐘企喺廚房完全未坐過，諗住出到㕔可以坐下啦，竟然冇哂啲凳，我99話咁多人迫叫人放哂啲凳入房，個個企喺到食😭😭
我心諗你打咗幾個鐘梗係唔洗坐啦！終於我夾咗少少嘢食想去梳化坐，點知99同啲姨媽姑姐一早霸哂好似老佛爺咁款叫人夾俾佢食，見到我過去仲話你坐啦有咗要休息下（但冇人起身），不過我當時都仲未後悔，心諗一年一次姐。
一路食我99猛話人多打邊爐食唔到嘢（已開兩個爐）又迫又乜又七（我兩公婆住三房兩廳），自己食飽喺咁明示暗示想人快啲收嘢俾佢打牌，戲玉嚟啦：
99：你聽日洗唔洗返工呀？
我：我要呀（我返shift,初二係特登爭返嚟放）
99:你今日都未打過🀄️
我：你地打啦，好早姐（十點幾）你哋打多四圈八圈lor（我知係佢想打）
99:係lor,你返工姐，xx(我老公）唔洗返嘛⋯⋯
於是佢地火速拎返啲凳出嚟開返兩枱，我老公洗碗，我執嘢攪掂哂後終於可以同啲表乜表物吹下水鋤下D,點知俾人炒幾十次佢哋都未打完，人都走得七七八八。成點幾兩點99仲好意思暗示想食嘢，我拎糖果零食又話凍想食熱嘢，我叮咗幾包叮叮點心俾佢地，我99仲話想飲茶🤦🏼♀️可能真係太攰，我嘅EQ跌到谷底，忍唔住答佢我哋唔飲茶，屋企冇（之前沖過😅）跟手煲好哂水添哂嘢飲入雪櫃，好彩都有啲三姑六婆識做話自己攪掂。
三點幾，62一枱起身，我仲以為終於打完，竟然99叫62同叔仔call車返去先🤦🏼♀️，走剩99一枱，我頂唔順沖涼瞓覺叫老公頂住，約5、6點我老公都頂唔順叫佢地走自己鎖門
最後，真係最後，99打到朝早八點幾。
之後6299嚟我用有BB為由冇再開過🀄️99夠膽死十二朝嚟睇B都想🀄️當然生B之後99啲戲一浪接一浪😭
好彩我同阿B母子平安。
#退一步海闊天高
#我的極品四大長老
