《春嬌救志明》影評
「但願愛情是一場永不甦醒的夢」
—談電影對兩性關係的啟示
（含劇透，講下「滑左啞」嘅愛情）
—
—
—
—
—
戲名
—
《春嬌救志明》套戲，好評雖多，但好少人好可以好實在咁講到套戲究竟有咩好睇？（笑料啊，粗口如「小不忍含得撚」、「呢個可兒真係好撚可疑啊」果D我唔講了，個個都識笑唔洗我講啦係咪先？又或者由秦沛演睇古惑仔睇得多嘅大叔，佢本身就係《古惑仔之龍爭虎鬥》嘅拿督啊！甚或乎佢去夜場搵到angela同fish呢對孖妹，又何嘗不是《旺角揸FIT人》「我要扑孖妹」吳鎮宇傑青的典範？）反而比劣評嘅人講嘅野係仲實在，例如佢地會問究竟春嬌點樣救左志明啊？春嬌根本就係一個公主病患者！或者套戲嘅衝突點太弱，咁多年感情點因為呢d小事而分開啊？甚至質疑彭浩翔已經唔係彭浩翔了云云。於此，我實在好想為彭導作某程度上嘅平反。
—
首先，講番個戲名，春嬌究竟救左志明d乜野呢？我相信呢個只係彭導一如以往嘅本色玩笑，就例如點解要叫《大丈夫》，佢地唔係只是一班呃老婆嘅雞蟲嗎？事實上，「春嬌9志明～」呢句說話由張志明本人講番出黎，係更加sweet嘅，雖然係套戲入面，個個都會理解到余生的確係較成熟嘅一個人，但好多時候，感情就係要在無傷大雅嘅情況下將感性超越理性的，就例如當你個女友問你佢係咪世上最靚果個女生嘅時候，你係咪要用部超級電腦計曬所有女人嘅outlook黃金比再出結果呀？
—
就好似明明係志明救左春嬌（最少今集係啩？），但偏偏就要話係自己比人打救，咁樣你係春嬌嘅話都咪話唔sweet。而再諗深一層，邊個救邊個係咪又真係要去計呢？兩個人相知相愛，本身就好難用理性去計算，如果真係要逐樣野去衡量，相信我地都無可能會同我地所愛嘅對方坦誠相對，講真話，或者玉皂相對吧？（唔驚你突然傻左剪左我啊？哈！）所以與其要拗係邊個救左邊個，不如話係大家都救左大家，係看似熱鬧但實質寂寞嘅都市入面搵到一個可以除下面具嘅人一齊生活，一齊成長，計算並無意思，好似《漩渦》首歌所講，「是誰被捲入誰紅顏禍」，雖然要攬住一齊死，但去到呢個moment都唔應該賴任何人，只要相愛至死終老就好了。
—
相遇相識相愛
—
而如果要將套戲嘅三部曲當做一個脈絡去睇，第一集講嘅當然係兩個人「相遇」嘅故事，係後巷打邊爐打出激情；而第二集就係講緊「相識」，二人經歷左分開，經歷左第三者，因而明白自己實在唔可以無左對方而再度復合；而第三集則係講緊「相愛」，激情無了，原來係船灣水塘真係等緊睇ufo，而唔係野外露出；春嬌著護士裝唔會令你血脈沸騰，只會得啖笑；而你地開始收埋「最好嘅你」嘅面具，去開大唔會立即沖水臭親darling，仲會比對方研究自己嘅便便味；春嬌仲會求「愛」不遂……
—
「喜歡」和「愛」的分別
—
「喜歡容易相愛難」，我和很多朋友都講過，我是很喜歡上別人的，男人嘛，視覺動物，別人係靚女，你那有不喜歡的可能？但之後我會想，當我可以喜歡很多人的時候，這又是不是代表我什麼人也不喜歡？然後我就發現，人很多時追求的不是「喜歡」，而是「愛」。就如春嬌與志明，在第一集的時候，二人在後巷相遇，一起食煙吹水，傾計多左，自然就會「喜歡」對方，因為他們與對方有著差不多的愛好，差不多的「外貌」級數（笑），走在一起是非常正常的一回事，在現實當中屢有發生。
—
但當相識久了，兩個人的頻道總不可能百分百相同吧？就好似春嬌永遠都不會明白一舊垃圾「達利」為何會值九萬五蚊（舊錢用黎買隻求婚戒指比我唔係仲好？）仲要比個男人講到舊野好鬼有用；志明也真的不知道「小雙俠」到底係乜東東，更莫講話首歌。矛盾於此就出現了，雙方可能有好多各式各樣嘅誤會，例如”M COME”呀，例如邪花入宅呀，好多分歧，最後會淪落到用果部好盞鬼嘅「決定機」黎做二人嘅決定，好兒戲又好寫實，我地好多時有關關係嘅決定，又豈不是「亂鳩咁黎」？。
—
愛請問怎麼走
—
唔少評論都講呢套戲嘅笑料太多，反而真正嘅愛情衝突位好似描寫得未夠，例如明明台灣地震單野，係春嬌公主病，志明其實係岩曬，係好理性，而呢單野最後都無人出事，係咪咁輕易就可以令一對情侶分開呢？
—
對於呢個批評，我係局部同意的，我其實都認同呢個情節嘅衝突位實在太弱，弱嘅地方在於點解二人分開左咁短時間就要係番埋一齊？彭導其實可以再加大描寫二人面對分開時嘅心境同行為，春嬌話曬都叫試過「自殺」啦，志明嘅描寫真係弱得可憐（可能都關片長關係）。坦白講，我係非常讚同主角二人係要分開的，因為你睇佢地嘅相處模式就知兩個人一定唔會長久。
—
係電影中，除左台灣果單野，其實兩個人都吵過唔少次交，但大家有留意兩個人嘅處理方法係點嗎？唔知其實都係正常，因為套戲根本無認真交待過，通常就係一擁入懷，或者轉眼間就去左第二日，太陽如常升起。係電影入面大家當然覺得無問題，但在現實層面，情侶之間嘅問題只會愈積愈多，每當吵架，就會是大家翻舊帳嘅時候，你以前點點點呀，一直以黎忍你好耐呀，我幫你乜乜乜呀咁，醉翁之意不在酒，好多時最後罵嘅野，同原本件事可以一D關係都無，同樣道理，台灣單野只係二人關係破裂嘅觸發點。
—
祝福詛咒的一體兩面
—
「難道我可以扭轉宿命重遇你一次」，電影就有，現實係無。究竟時間對於情侶係咪必定要係一道詛咒呢？對我而言，我實在好想佢係一個祝福。按道理，一起時間愈長，磨擦一定愈多，因為你會比對方見識到更「真」嘅你，宿命黎，無得改變架喎，你見好多夫妻都係靠個「忍」字去相處，捱到老架啦。
—
但離地嘅我，反而會去諗，點解時間唔可以係令兩個人了解更多，進步更多嘅靈藥？而係段關係之中關鍵之中嘅關鍵就係—「溝通」，時間可以令問題累積，但同時亦可以令問題一個接一個咁去被「解決」，個重點就係兩個人面對問題時候嘅態度。如果兩個人可以每逢遇到問題嘅時候，選擇去冷靜溝通，然後磨合，真正地「解決」（唔係hea對方），隨住時間過去，兩個人的感情只會更加穩固；而相反，感情只會愈黎愈脆弱，因為關係嘅基礎不斷去比風雨侵蝕，看似牢不可破，實質彈指可穿，去次旅行遇到輕微地震都搞得掂你兩個。
—
《春嬌救志明》係呢個話題上同《一念無明》係相通的，遇到問題，我地唔係要逃避而要去直面，比多D同理心就可以減少好多埋怨。而要去講精神病同親蜜關係，後者必定更容易達成效果，呢樣野都係我深深相信愛情嘅原因。理由在於你要去除精神病係社會嘅汙名化，你要改變社會上每個人嘅思維模式，這是近乎”Mission Impossible”嘅事，但要係戀愛或關係中達致有效嘅溝通，只有你係世界上搵到一個人肯同你咁做就夠。
—
永遠的「零」
—
而余春嬌搵到果個人就係叫張志明，唔識小雙俠其實真係無咩大不了，最緊要就係個心，最緊要係你嘅選擇，愛情呢個玩意，係外星人黎到地球用幾精密嘅計算都計唔到答案嘅東西，因為答案一直都係你嘅手中，你去求籤祈禱都無用，即係slogan講緊嘅「自己感情自己救」。你笑趷趷剛幾無里諗頭都唔緊要，最緊要係你笑完之後，你會將對方講嘅野”take it seriously”，幾無稽都好，有我花時間花心力出汗水去陪你無稽，因為你就係我臨死前想起生命中最重要嘅人，愛情從來都係「逾越了理性 超過自然」嘅事。
—
「拍拖拍得開心好難架」，但有時難，先至有意義，換畫當然容易，你係放狗果度一晚都唔知搵到幾多個你「喜歡」嘅dada或者女飛魚。有老豆嘅羈絆，余春嬌唔想再比人拋棄；有年齡嘅包袱，女方對自己無信心，覺得自己無可能同大唔透嘅志明行姊弟戀呢條路；但呢d野好似戲中咁講，都係後話啦，真愛無敵，肯真心真意去同世界上「一」個人溝通，又有咩會難到佢地？
—
愛不是喜歡，但亦包括了喜歡，同時含有承擔，好似志明咁，係收尾搞咁大壇大龍鳳，唔洗勞心勞力啊？愛就是無言的犧牲，你唔肯去犧牲，你唔肯去愛人，你亦唔值得被愛。地震中其實沒有誰對誰錯，但如果大家都可以放下自己，衝去對方果度然後相擁，肯真心為對方付出自己，你以為比左自己出去，你就變左永遠的「零」嘅時候，最夢幻嘅就係你同時都拎左對方，成為左彼此嘅「一」，咁一切問題也會迎刃而解。
—
愛情若果都如夢一場，但願這是一場永不甦醒的夢。
—
《春嬌救志明》
—
（一篇影評其實要寫嘅時間真係頗長同相當費心力的，正如呢篇野都過左三千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
春嬌救志明 Love Off the Cuff
Pang Ho-Cheung 彭浩翔
余文樂 Shawn Yue 楊千嬅 Miriam Yeung
Making Film 正在電影
Fish Liew 廖子妤 Angela Yuen 袁澧林 Koyi Mak 麥芷誼
Movie Express電影速遞
寰亞電影 Media Asia Film
cuff it意思 在 【Disco】Beyoncé 碧昂絲- CUFF IT : 制伏(Lyrics) [非官方中文 ... 的推薦與評價
" CUFF IT "是美國歌手Beyoncé 第七張錄音室專輯《RENAISSANCE》的收錄歌曲，於2022年7月29日發行。這首歌由Beyoncé, NOVA WAV, Raphael Saadiq, ... ... <看更多>