上星期心血來潮有個諗法：「不如請大家分享嘅自己想睇但又無時間睇嘅書。」
點解咁做？一來，係因為我想更深入咁認識呢度嘅朋友。二來，我亦想借呢個機會，擴闊下自己嘅眼界。
最終，我執咗十七本書；其中十三本係 Patreon 會員提名，另外有四本係我自己嘅推介。希望 2021 嘅上半年，可以寫起晒以下呢十七本書嘅精讀掫要同評論，同 Patreon 嘅會員分享。
加入 Room 101 by 利世民
https://www.patreon.com/join/LeeSimon/checkout?rid=6507958
＝＝＝ 我 是 分 隔 線 ＝ ＝ ＝
【#1｜Benoit Mandelbrot, The (MIs)Behavior of Markets 】 點解市場咁唔穩定，不可測？當一個系統裡面有好多互為因果嘅關係，其實好自然就係唔穩定同不可測。知道咗喇，咁又點呢？相信大家最想知嘅答案係：「假如明知市場嘅特點，又可以點樣征服市場？最低限度，點樣先至唔會轟烈陣亡？」最後，雖然多數人見到呢個題目都會諗到財經金融，但其實一理通，百理明，任何社會現象背後嘅演變軌跡，亦大同小異。
【#2 ｜Timothy Brook, Great State: China and the World 】 呢本書嘅重點係：「目前我哋見到嘅中國，其實延伸自被蒙古征服之後所建立嘅大國家結構（Great State）。」書裡面十三個單元，可以單獨去睇，但串埋一齊，又有個更大嘅故事。最重要係，歷史書，睇落好似講過去，但作者好多時都係講緊目前；當然，更值得大家推敲嘅，係究竟從作者所鋪陳嘅歷史，究竟 Great State 嘅未來又會點。
【#3 ｜Steven Pinker, The Better Angels of Our Nature: Why Violence Has Declined 】 雖然我哋成日都覺得，兩次世界大戰好暴力，死好多人；有啲社會，好似美國，槍械泛濫，日日都有人死。但實際上，今時今日嘅世界，人與人之間嘅暴力，少過以前好多。人類文明嘅定義，就係唔再講打打殺殺，係咪？但點解會有呢個現象呢？如果話人性本來就係殘酷惡毒，又係乜嘢原因令人嘅獸性受到壓抑呢？又或者，過去幾十年來相對嘅非暴力，其實只係異數？
【#4 ｜ Neil Postman, Amusing Ourselves to Death: Public Discourse in the Age of Show Business 】 呢本書最初出版係 1985年，當時最主流嘅娛樂係睇電視。但到今時今日仍然有人話，呢本書嘅講法一樣可以用來分析 social media 。當一個觀念可以貫穿唔同嘅時空，佢就符合經典呢個定義。究竟 The medium is the metaphor 呢句說話，係乜嘢意思？假如話電視係「公仔箱」，咁手機又應該係乜嘢呢？
【#5 ｜ Ray Dalio, Principles, Life and Work 】 Ray Dalio 搵好多錢，好叻，我最初留意佢，亦都係因為 Bridgewater Associates 旗下基金曾經跑贏大市。不過，如果因為佢搵好多錢就睇佢寫嘅嘢，就好容易失望，因為我唔相信成功可以複製。好多年前，Principles 仍然係一份可以免費 download 嘅 pdf，我都已經搞過讀書會討論分享。Ray Dalio 係個有諗法嘅人，佢亦都好落力去宣揚佢相信嘅價值觀。Principles 裡面所描繪嘅做人態度，我形容係「極端理性主義」；究竟咁理性嘅人，係咪好不近人情呢？當然，我咁講得，就梗係覺得唔係喇！我甚至乎覺得，極端理性主義，先係真正嘅大情大性。
【#6 ｜ Simon Sebag Montefiore, Jerusalem: The Biography 】 話說有種心理病叫「耶路撒冷症候群」（Jerusalem Syndrome），去到耶路撒冷嘅人，會忽然感覺到聖靈嘅感召，做出一啲好怪異嘅行為。但生活響耶路撒冷嘅人，又會點呢？呢本書嘅作者野心好大，用一個地方嘅人同事，去刻劃三大宗教三千年嘅歷史。其實，過去我一直有個疑惑：明明地球咁大，大把地方嘅條件好過耶路撒冷，點解幾千年來，呢班人究竟係爭緊啲乜嘢？
【#7 ｜ Eric Hobsbawm, Fractured Times: Culture and Society in the 20th Century 】 因為想從一個馬克斯主義者嘅角度睇現代資本主義社會嘅歷史，所以其實我一直都想開始讀 Hobsbawm 嘅著作。既然有朋友提名呢本書，就不如由呢本開始喇。
【#8 ｜ Michael Sandel, The Tyranny of Merit: What’s Become of the Common Good 】 好多人鍾意 Michael Sandel ；佢嘅 Justice 同 What Money Can’t Buy 我都有認真去讀。坦白講，我認為 Sandel 叻在將知識普及，但就唔算得有咩個人又或者創新嘅構想。不過，就算係唱「別人的歌」，只要唱得好都值得欣賞嘅。Meritocracy，粗粗地咁可以解做「有能者居之」究竟 Sandel 會點樣去反對？
【#9 ｜ Robert Greene, The 48 Laws of Power 】 Greene 嘅書，我淨係睇過佢寫嘅 Mastery。如果無記錯，當時應該係睇完 Malcolm Galdwell 嘅 Outliers 之後，順手睇埋。我對 Greene 嘅評價係：「一個好識得將唔同嘅故事炒埋一碟上枱嘅作者。」
【#10 ｜ David Benatar, Better Never to Have Been: The Harm of Coming into Existence 】 呢個提名好特別；雖然我只係好簡略咁睇過些少背景資料，但直覺已經話我知，呢本書個種離經叛道嘅程度，係 handle with care 嘅級數。
【#11 ｜ Niall Ferguson, The Square and the Tower: Networks and Power from the Freemasons to Facebook】 呢本書其實都係我自己嘅書單上面好耐；我想睇呢本書係因為佢嘅主題係 Network （The Square） vs Hierarchy （The Tower） 。但令我有少少猶豫嘅係呢本書有少少標題黨；我都幾肯定，有人以為本書係講 Freemasons 同 Facebook 嘅秘聞就衝咗去買。
【#12 ｜ Matthew Walker, Why We Sleep: Unlocking the Power of Sleep and Dream 】 提名呢本書嘅朋友，問我有冇話一定要咩範圍。其實我近年嘅興趣都好雜；好似之前 James Nestor 嘅 Breath ，我唔單止有睇，做埋實驗㗎。
【#13 ｜ Jane Mayers, The Dark Side: The Inside Story of How the War on Terror Turned Into a War on American Ideals】
【#14 ｜ Jane Mayers, Dark Money: The Hidden History of the Billionaires Behind the Rise of the Radical Right 】 呢兩本書，The Dark Side 係講 911 後嘅美國，Dark Money 係講 Obama 年代共和黨嘅分裂同變異。一睇就知，作者好唔鍾意共和黨；但我又睇吓，究竟呢個本書可以有幾咁深入，有幾多大家未聽過嘅秘聞。
【#15 ｜ Kate Fox, Watching the English: The Hidden Rules of English Behavior 】 似乎係本輕鬆小品；既然呢期咁多香港朋友都諗住去英國，又或者已經身在英倫，寫呢本書嘅推介，應該有市場啩。
【#16 ｜Kevin Kelly, What Technology Wants 】Kevin Kelly 我嘅形容係「奇男子」「先知」；先知，其實都係早過你知，但佢就早過我哋知一啲好重要嘅嘢。例如早在 2008 年佢就提出，話有 1000 個真正 fans 就可以做一個專業嘅 creator；呢個講法，比起依家大行其道嘅 passion economy，早咗十年。但我認為 Kevin Kelly 嘅真正代表作，係呢本 What Technology Wants。Kevin Kelly 對科技嘅發展，好樂觀；就算終有一日，機器嘅智能，將會做到甚至超越人類，但咁又點？汽車快過人類，咁你係咪打跛雙腳吖？工具嘅存在，被動咁睇係解決問題，但主動咁睇係去增加我哋嘅可能性。Kevin Kelly 用嘅例子係：如果莫扎特出生早一百年，當時冇鋼琴，咁佢仲係唔係咁偉大？雖然呢本書係十年前嘅作品，但先知嘅預言，就梗係要攤一陣先至可以公道咁評論，係咪？
【#17 ｜Garry Kasparov, Deep Thinking: Where Machine Intelligence Ends and Human Creativity Begins 】今季壓軸係 Kasparov 講返佢象棋事業高山低谷嘅自傳。雖然呢本書唔少篇幅講佢對 Deep Blue 嘅對弈。但就算你唔識，又或者唔鍾意捉棋，都不得不配佩 Kasparov 嘅 insight：「既然人類遲早都會輸比電腦；我寧願做歷史上第一個輸畀電腦嘅世界冠軍。」當然，輸咗棋之後，佢一定好多反省，但佢嘅結論係唔應該抗拒電腦，反而係要諗點樣用電腦令人腦嘅功能更強大。Kasparov 都有講到 Singularity，但佢比 Kevin Kelly 更樂觀；唔好忘意，Kasparov 曾經當住全世界面，畀電腦活生生咁蹂躪，連佢都話人工智能是個好東西，或者我哋都應該趁早了解其實呢個係一個咩心態。
jerusalem意思 在 迦百農（Capernaum），意思是「那... - Kokia House Visitors Center ... 的推薦與評價
Kokia House Visitors Center, Jerusalem . ٨ أبريل ٢٠١٩، الساعة ١:٢٨ م ·. 迦百農（Capernaum）， 意思 是「那鴻的村莊」，位於加利利海西北，福音書描述它是「 ... ... <看更多>