一個在流浪的香港人的心底話:
1997年，當時得10歲左右，回歸，睇電視見住彭生走，記得當日下著毛毛雨，呀嫲話，個天都唔捨得港督，我唔知咩事，只係覺得彭生個樣幾慈祥，對住電視同佢講左句byebye你條尾。
之後睇電視，應該係投票掛，只聽到係咁"DongJinWah"，果時都唔知咩事，就有另一個慈祥伯伯做香港領袖。
讀中學時，學校冇特別教國民教育，我甚至連國旗係咩樣咩意思都唔太清楚，然後中三果年要讀普通話，只修一年"波、破、麽、科"，覺得冇特別，冇乜理，求其合格咪算數。
中四經歷恐怖疫情，人人自危，不幸學校有人中招，因為咳嗽，被校方勸阻回校，我當時覺得香港人好冷漠，好可怕，覺得唔知仲有冇將來…覺得香港是一個被世界杯葛的疫區…被牆圍住，冇自由失自由傷心痛心眼淚流…
中七開始做part-time，走去幫人補習，先開始一邊補一邊睇番中國歷史，覺得好有"趣"，尤其對中日戰爭的形容，我軍"以敵人的後方為前方"，終於"勝利"。寫得好好，當時冇留意乜叉寫作手法，覺得原來中國都幾好波喎，咁都寫得出…
唔知邊年奧運會，中國跳水隊有靚仔田亮，香港人齊心大叫“中國加油”，果時我以為，哩d就係叫做“愛國”掛，咁我愛靚仔，我諗我都係愛國? 我唔知呀，因為其實我地香港自己有一隊架喎，到底中國隊係乜?
到大學幫人補習，多了"通識教育"，先至知原來中國國旗、國情教育係一科要讀既野，我放棄幫人補中文，唔想因為普通話教到人愈來愈普通甚至唔合格…乜香港語文變得咁快既…
好，出來做野。一個二個“過來人”同我講將來，“做XX好呀，有XX照住，冇咁易炒你架。” “考XXXX啦，薪高糧準，冇得輸架啦！” 所謂將來，叫做“供樓供車結婚生仔穩陣過世”。
好，做XX請盡量避談政治，“唔方便架，咪出聲!” 然後抽身出來，回想，什麼是洗腦? 當所有人在同一環境，接收同樣是“真理”的資料，根本唔知出面世界係點，我估咁樣叫做洗腦? 好似有個旅行中的大陸朋友係臨完行程時，在fb最後遺言，“最後一天在牆外的日子了，明天回國不能再用fb和ig了…”，我想知咁算唔算自由? 算唔算洗腦? 算唔算封閉? 我覺得佢係出冊之後要入番冊…
我好耐冇睇電視，因為我冇錢比第二d台，免費電視台新聞台呀媽成日播，我間中望下，佢講乜接收者聽乜，好直接，一般平民要知多點，要分析多點，要花多點時間，亦唔係個個有哩d閒情逸致去慢慢研究。咁既香港重要媒體，又算唔算洗腦?
呀媽冇再訂生果日報，因為貴。我睇新聞也變左係網上睇，我唔知呀媽仲有冇睇新聞既習慣，我淨係知有一日同屋企人出街食飯，佢同我地講，果日出左去參加反佔中遊行，我問佢點解，佢話“因為約左人”，之後仲比靚相我地睇，我話“我代表香港市民多謝你”。
其實，香港真係好特別，特別到我而家覺得好無奈。
我係一個80後，一個普通草根。
一般草根求穩定，望將來生活得好點。我從來沒特別考慮自由問題，因為我一直以為自由係必然既野，直至開始愈睇愈多，覺得點解香港會咁奇怪，好多人因為麻煩，完全杯葛政治新聞，覺得上街人士阻住地球轉。社會分裂到9彩，我地開始反省，到底“自由”係乜，到底“警察”係乜，到底“香港”又係乜…?
我地死做難做好多人都係為“未來”而努力，但到底我城既未來係點? 我從未試過覺得香港咁“陌生”，咁“可怕”，即使沙士時代，都冇咁可怕。
教過一陣書，開始明教育對下一代既影響，學生真係會問，“你話我上唔上街好，XXX話上左先叫香港人喎!” 咁我作為一個領袖仔，我有責任好好領導佢地，唔係答上定唔上，因為我覺得真正自由係佢地自己諗，我只能做引導角色，我地冇權幫佢地決定，但我知道有學校“勸籲”學生因“安全問題”唔好上街，學生好乖，全部填鴨等你慢慢餵，你話上咪上，唔想咪唔上，哩d叫乖仔乖女。
人在流浪，被人問最多果題係，“where r u from?” 好明顯答案一定係 “Hong Kong”，但遇上N個中國旅人幫我搶答 “China”。試過係hostel飯桌上因為“中國人”定“香港人”而有少許激既討論。就係一句“我們都是中國人”令我覺得唔舒服，甚至我朋友話難聽過粗口。
哩幾日因為香港上左國際新聞，我答完我來自香港之後，佢地冇再話“okay, China”，而係話"okay, different passports" "how's HK?"，我因為咁覺得好驕傲。
原本外遊唔會點諗香港，但近哩一星期真係抽離唔到，我好自閉，日日睇新聞，收到呀媽訊息話“香港好亂”，我答“我知”。明明應該係佢叫我小心，而家好似調轉左咁。
平時外遊畫既係當地既野，近排一畫就忍唔住係香港，原來活左廿幾年，香港一直既自由，令我地識左好多野，起碼有教育先至令我知咩叫“Maslow's Hierarchy of Needs”，而爭取民主係“Self-actualization level”，中國共產主義的餵飽你你就唔好再出聲係“Physiological level”。
香港人好累，我係外地都覺得好沉重。如果香港人只求3餐溫飽就算，咁大家一定唔會上街表達意見，批判思維係老師教既，免費教育係政府比既，而家調轉頭比人話學生讀屎片，比人追住學生話擾亂社會秩序，我覺得好恐怖。
其實，我仲想教書，因為我唔想第日下一代同我講，“民主自由係坐係屋企乖乖地等佢來，有得食咪算lor”。
希望回來之日，香港仲係叫香港，而唔係叫中國。
My instagram: www.instagram.com/unpauvrevoyageur
My blog: www.unpauvrevoyageur.blogspot.com
maslow's hierarchy of needs中文 在 馬斯洛：需求層次理論(Maslow's Hierarchy of Needs) - YouTube 的推薦與評價
0:38 - 4:24 需求層次理論中的五層需求4:25 - 5:38 自我實現與高峰經驗5:39 - 7:12 需求的陷阱和幻覺7:13 - 8:26 理論運用& 總結-為什麼有些人會「窮 ... ... <看更多>