［地王奇聞］投地居然唔係價高者得
話說星期一在明報專欄篇文提到，競爭制度（https://bityl.co/7x5e）（唔知係咪訂戶先睇到）。經濟學嘅嘢，就係分餅仔，利益分配。
因為薪有限，做無限，資源有限，而人嘅慾望無限，所以有scarcity，不同嘅制度都係用嚟分配，邊啲人應該先，邊啲人應該後。乜嘢人有份，乜嘢人冇份。
留意呢個並唔係好多人以為嘅「有錢萬能」。唔同嘅制度有唔同嘅規則，就有唔同嘅贏家輸家。例如排隊，就係鬥耐性鬥得閒鬥毅力。抽簽，咪鬥好彩。價高者得，當然係鬥多錢（其實係鬥肯畀錢：佢出錢多過你唔代表佢有錢過你）。好多時冇話公唔公平，無知之幕嘛，我係林丹就覺得打羽毛球最公平，我係劉丹覺得鬥斬叉燒先公平。重點係：你想乜嘢人贏，個初心係乜。
咁，例如我講過入大學，至少表面上，都係睇成績（雖然唔完全係）。冇話一定要咁架，可以價高者得的，亦可以抽簽，甚至排隊。但我地覺得應該畀公開試成績好嘅人讀嘛，原因？可能因為佢地叻啲，讀完對社會貢獻大啲，或者奬勵佢地肯努力，或者係肯考好個試嘅人，一係本身叻，一係好肯付出。乜都好。我地覺得呢個標準，好過我排隊，結果整件腦殘但排足一個星期嘅入大學，對不？
再講一次，例如普遍民主選舉都一人一票（雖然都有人反對，認為老嘢應該少啲票），但股東會就唔會一人一票。都係因為唔同嘅目的。
好啦，但煩在乜？就係煩在，「酌情權」，呢啲就係藏污納垢，「佢地」唔想你知嘅嘢。大學或多或少都有呢啲「酌情權」，原因你懂的，唔係啲富家子弟點解個個入名校？固然又唔完全係買個位，但，還是你懂的。
至於制度化啲嘅玩法？我以前都寫過，雖然古今中外，都係有錢子女資源較好，可以搵人補習之類。但始終，你本人都要親自上陣，如果貴子弟真係太廢，都冇計的。
之但係，大家都知近十幾廿年，玩乜呢？「唔好只睇學業成績」。最好笑係，贊成嗰啲有時就係受害人。唔鬥學業成績下話，咁鬥下社區頁獻呀，你有冇國際視野呀咁咯。咁就玩死。你係窮家子弟，我天份好日練夜練嘅，數學高分過個富二代唔難。但你玩「唔好只睇學業成績」，哈哈，人地得閒就去緬甸做下義工，暑假就去歐洲博物館，Uncle Auntie開口EGS閉口NFT。貴子弟就做麥當勞兼職。然後第時面試講下國際視嘢，講下法國紅酒RP評分同全球暖化嘅關係，你邊有得玩？
點解諗起呢啲嘢？早排有單新聞，都相當有趣。500億中環地王。你心諗，投地嘛，咪價高者得，好合理啫，對庫房都好，有乜問題？
就係唔係價高者得呢下怪咯！
話說，今次唔係價高者得，出價只佔一半，另一半係「項目設計評分」。呢啲，就係緬甸山區做義工啦，呢啲位就大把嘢可以玩。
港鐵（連埋華懋九倉）有份投官地，而今次係港鐵史上第一次投官地（以前都係地鐵站上蓋）。好啦，應該見到問題啦？港鐵大股東係政府嘛，董事局主席就特首任免嘅，四個高官做非執董，你話有冇鬆章？OK，唔應該小人之心，冇證據不能亂局。但，做乜今次先搞呢個「唔係完全價高者得」
雖然完全唔關事，但令我諗起當年請廣播處長，忽然改規則，冇大學學位都可以。點解？疑似係因為當年有位仁兄冇大學學位，疑似想幫佢度身訂造。嗰位仁兄叫周融。（不過to be fair，最後佢係冇中獎嘅）
照計我唔會收律師信啩？呢個利益衝突，明報都有講（https://bityl.co/7x6R）。官方反應當然你都預咗，「我會避席」（即係去廁所咁）。就算你話官員唔鬆章，大公無私，港鐵本身都控制住香港站中環站，「項目設計評分」肯定先天優勢。
實情，港鐵會唔會即係回購下股份，大家會仲happy？本人都係小股東。
以下係專欄節錄
=======================================
近期的奇人奇事，就是已截標的中環新海濱3號商業地王（估值超過500億），《明報》也有報道。讀者心想，投地價高者得，有何奇事？就是奇在不是價高者得！除了價錢外，還要計入「項目設計」，這就是「緬甸做義工」了。
留意今次是港鐵（聯同九倉及華懋）史上首次入標投官地（之前全是鐵路上蓋項目），眾所周知港鐵的大股東是香港政府，董事局主席由特首任免，另有四名高級官員擔任非執董，港鐵與政府關係非常密切，當中是否有利益衝突？况且今次更罕有地不是完全價高者得，讓政府有很大的「酌情權」，這對庫房又是否是好事？
官方回應自然是「依法辦事」，有關官員會離席，但，今次安排難免令人懷疑是否「度身訂造」。即使退一萬步說，沒有利益衝突，但港鐵本身已控制香港站及中環站，肯定在「項目設計」上可以有先天優勢。
事實是香港消費市道已復蘇，但港鐵股價卻未見太大起色，若有閒錢倒不如回購股份，人人開心。對，筆者也是小股東。
九廣鐵路主席 在 [新聞回顧] 九鐵兵變(一) 2006-03-11 九鐵署理行政總裁黎文熹 ... 的推薦與評價
[新聞回顧] 九鐵 兵變(一) 2006-03-11 九鐵 署理行政總裁黎文熹去信管理局反映同 主席 田北辰意見分歧導致管理出問題. 3.8K views 1 year ago. ... <看更多>