印度人多，乜都要排隊，但一切又其實無排隊之實。
話說我係 Delhi 機場等 check in，本身排得幾前。有一家人到左，排去最尾，一切好正常。忽然，排我前面嘅另一家人認識剛剛到達嘅一家。一輪揮手之後，兩家就係我面前團聚了。你要知道，印度一家人都幾龐大，一家出動本身已經係一條龍，於是我身前忽然企左兩條龍。
India 1:0 Dr Who
我到左幾日，發現印度小朋友都幾活躍。係企滿人嘅候機大堂都可以玩得不亦樂乎，應該當左我地所有大人係一棵棵樹，適合打野戰。佢地又真係會爬高爬低甚至劈樹，我無啦啦都比人打左幾下，數都差啲比人扯甩埋。排隊期間，我受到兩位小朋友左右夾攻。佢地圍住我係到射機關槍，我就唯有借住前面一個髮夾彎，搶個內圈唸住逼佢出局。點知，小朋友們身經百戰，係外圈一比油已經衝左去我身前。係呢個時候，旁證，亦即係佢娘親，全面調停。口中「sorry sorry」咁行前叫班小朋友企好咪再玩，鬧完自己都企好，一家人順理成章咁企左係我前面。
India 2:0 Dr Who
終於去到排隊登機。今次隊就得一條，我又排到好前，心唸無死啦掛。忽然，一陣宣佈過後，隊伍由一分四。由於擴音器太拆，我連印度文同英文都分到，大家都已經前呼後擁分別企開。四條隊，有兩條寫住第一至二十行、兩條寫住二十至四十，身為第八行嘅我咪排囉。排到，空姐面帶不耐煩咁講左一大堆嘢，指我去另一條隊，又唔解釋，我到而家都未明白我點解係屬於「第二十至四十行」。唔緊要，照排囉。排排下，頭兩條隊已經走哂，我後面有位男士忽然推問我衝去個一邊。我心唸「呵呵～準備比人彈回頭啦你」，點知佢成功過到。其他人見狀又衝哂過去。我又從頭幾位變左最後個幾個位。
細機場、細飛機，過左櫃枱要上細巴士去上機。剛剛好我前面有一班巴士開左，職員示意我係一個站頭排隊。排我後面嘅男士好似唔係好相信我。企左係我後面之後攝前攝後，東張西望，發現另一個車站之後仲決定另開新隊，我心唸唔關我事。點知點知點知，職員竟然叫另一架巴士泊左係位男士個站頭到！唔係我唸邊！喂，你咁明陰我啫！
India 3:0 Dr Who
一輪莫名其妙之後終於去到飛機。英女皇咁慢慢行上飛機，見到兩條龍、野戰、髮夾彎、旁證、車站男同埋另開新隊男，全部坐哂係到。
我面露勝利嘅笑容，心一句：你快左係唔會快啲走到架，你咪又係要等埋我，傻豬黎嘅。
Dr Who 勝。(我話嘅)
#DrWhoHK
#DrWho去旅行
#Who去印度煉神油
印度機場無論國際定內陸航線都有嚴格檢查。好彩嘅係，無論條隊有幾長幾多人，印度辦事效率 (如果肯開工) 其實都好快，雖然佢地唔到最後一刻都唔會開始做嘢。
🔻🔺🔻🔺🔻🔺🔻
IG: DrWho.HK (instagram.com/DrWho.HK)
FB: DrWho.HK (facebook.com/DrWho.HK)
🔻🔺🔻🔺🔻🔺🔻
