話說，人妻先生有一個上司，比我大兩歲，亦比我高兩級，由於佢樣子真係好似梵高的《自畫像》，所以我每一次見到佢都好開心。
由於我地條team好細，幾個下屬都是在不同國家，嚴格來說，整個團隊只有我和他兩人在同一個辦公室裡工作，我們開會在一起、食飯在一起，做gym... 呃... 也偶爾在一起，只是為了避免兩個男人在力量上的正面交鋒，到左第二日兩個人周身肌肉痛回公司，我們都會避免在同一時段練習。
起初佢坐在大老闆旁邊，我呢啲蛇王當然揀最遠處的位置，大概係佢係懷疑我經常唔喺位，所以索性搬到我旁邊、遠離權力核心陪我坐。結果，佢當然成功見證我經常唔喺位啦！他最好的地方，是他超級忙，吩咐我做一個task後，就不會再理我，所以我在工作上擁有很大的自由度，很多香港上司會覺得「自把自為、先斬後奏」的事情我都做了，因為等得佢批准真係蛇都死，而合作久了，他由「你做野就出封電郵CC我」變成「你搞掂先同我報告，你覺得合理就做啦」。
由於我地見對方，仲多過見自己老公/老婆，呢半年以來，同步率瘋狂攀升— 一星期撞兩日衫已經好平常，開會時交換眼神已經知道邊個負責搶攻，到後期進化到我聽佢打字的速度，若果以某種節奏放慢，配合某種呼吸的節奏，我就知道佢一定係諗緊野，並且將會在三至五秒內問我，可以除定耳機準備答問題。
今日更加癡線—
「嗨！」
「嗨！」
「早安！」
「早安！」
「你好嗎？」
「你好嗎？」
「你先！」
「你先！」
「哈哈哈哈！」
我和他在走廊相遇，同時間、同一說話、同一語速、一左一右拉開兩扇門，互相邀請對方先進入辦公室。
#你明唔明有一個同步率極高的同事係幾爽的一件事
#返工係一件好減壓的事情
#佢成日擔心我會嫌辛苦劈炮走左去
#我其實更擔心佢會轉工
#我可以五點正收工請問有幾辛苦啊
#偶爾係會激氣
#我覺得好有後生時搞學會的感覺
#啲青春返晒黎
#係預算多左啲
#幾百萬好似倒水咁好快就用晒
#留意返唔係我人工幾百萬呀
#唔好屈我請食飯
#繼續炫窮
