讀者投稿《關係極差奶奶篇》長篇
我同我老公都拍左成十年拖先結婚。
婚前同99關系一直都唔錯，但由結婚第一日起破裂。
話說99有三個仔，佢話三個仔娶老婆既禮金佢都準備好，因為以前99有擺啲錢係我到幫佢投資近年另一個仔結婚買樓等等洗左佢唔少錢，知佢無曬錢我好心就話唔洗啦，啲錢你老人家袋住個人都安落啲，禮金我自己比就得啦。我地結婚非常簡單開個幾十人Party就完左，之後約番99同我屋企人食飯點知佢一直推日日都話唔得閒唔方便(係佢屋企樓下食，車都唔洗坐)後來佢比左封利是同金鈪我，我睇都無睇就鎖起左，隔左排佢無啦啦同我老公講話覺得我好似睇唔起佢地咁，我完全唔知發生咩事，有日我心血來潮開左封過門利是睇，原來係$20，果刻我先明點解佢話覺得我睇佢唔起，幾萬蚊禮金我自己比，佢紅紙都唔封一張，仲衰過比樓下看更。。。。。
因為我係唔食魚，婚前上去食飯都有啖肉食下，婚後每次都係全魚餐，仲要絕到將啲魚湯倒落啲食到，啲菜用魚湯淥，然後開口埋口話我唔食魚所以近視唔食魚無仔生。
婚後第二年我有左BB，由佢知到係女果日開始每次見到我就話做女人一定要生仔，生唔到仔既女人無本事第日個老公想要仔你得個女就點點點，首先我同我老公都好想要女，人地大住個肚你不停講呢啲想點，有無諗過肚入面個小朋友有幾難過？我同我老公講其實你屋企咁嫌棄我個女，個女大可以跟我姓，之後我老公先叫我99收聲。
因為我係約開刀的，生之前一晚我老公話近啲又方便照顧叫我去99屋企瞓一晚，當晚99又準備左全魚宴，淨係比左碗白飯我食，我嬲到震，我老公話唔好嬲轉頭落街買野比我食，點知老公轉頭瞓著左，我就一直餓到生完Bb後第二日先有野食。
生完B後係媽媽家坐月，99其實住同一條村，都好有心上過黎幾次買隻雞比我煲湯，因為我地女家第一次有孫真係好開心，佢地之前做過幾多衰野我地都唔記得曬，我媽就約99滿月落樓下酒樓食餐飯仔，反正結婚果時都約佢地唔到，到左啊女滿月果日99派佢個女攞封利是上黎比我個女，話佢地今晚唔去食飯，理由係佢地唔興慶祝呢啲嘢，但叔仔個女早我地三個月滿月同佢地食就興？同我食就唔興？搞到我媽勁傷心，抱住我個女話嫲嫲唔錫有婆婆錫唔洗驚，我果刻真係覺得自己好對個女同啊媽唔住。
我係自己做生意大時大節有遲無早收舖，99當然永遠唔會等我地開飯，就係上年年三十晚食唔到，都諗住初一補數，點知上年年初一我個女就入醫院，出院後已即時去99家拜訪，一入門口當然係一堆冷言冷語話請我都唔到啊，新年流流學人入醫院乜乜乜，其實呢有得揀我希望我個女一世都唔洗入醫院囉。果晚我話人少少不如落街食啦，反正你一陣又全魚宴，要你招呼我又咁難為你，咁落街食咪幾好，反正都係我比錢，無謂大家背脊骨落啦，點知佢又唔肯，但佢又話手痛，攞隻雞出黎要我斬，團年飯開年飯煮十幾人飯就煮到，依家斬隻雞就斬唔到？跟住我見佢入廁所攞隻條布幫我個女抹手，我見到條布怪怪地咁，跟佢入廁所睇，原來係我62著過既底褲，我個女琴日先因爲腸胃炎出院，你今日用條底褲幫佢抹手？有無黑心到咁？我同我老公投訴，佢當然係繼續撐佢啊媽啦，話佢老人家睇唔到攞錯啫，然後仲要怪我唔體諒佢屋企人，因為呢件事冷戰左幾個月仲差啲離婚，從此我就無再見過我99。
而隊友今年終於睇清楚件事，仲話咁耐以來辛苦我，點解我唔早啲講清楚佢知。。。。。希望佢呢個心態可以維持到。
呢個世界上除左小三，99都係一樣咁鍾意破壞人家庭幸福。
#退一步海闊天高
#我的極品四大長老
